Shillong, Naitung, 01: Ka Urban Shopping Complex Association (USCA) ka la pynpaw ia ka jingbynniaw halor ka rai ban pynkynriah ia ki nongdie madan harud surok na ka thain Khyndailad sha ka mala ba shalor jong ka MUDA Shopping Complex.
Ha ka jingpynbna khubor, ka seng ka la pynpaw ba ka jingpynriah ïa ki nongdie madan sha ka mala ba shalor jong ka Parking Lot ka MUDA kan ktah jur ïa ka jingwan ki nongthied nongpet shapoh ka complex namar ka jingbym don ka jaka ieng kali.
Ka seng ka la kdew ba ka mala ba shalor mynta ka dei kaba la pyndonkam da ka MUDA, ki nongtrei, ki nongthied jingthied, ki nongdie dukan, bad ki paidbah, bad ka jingdon jong ki nongdie madan kan nang pynkhapngiah shuh shuh ia kane ka jaka. Kane, ha kajuh ka por, kan ktah ia ki kam kamai jong ki nongshah dukan ha ka Complex.
Related Posts
Ka USCA ka la kyntu ia ki bor pyniaid jong ka MUDA ban pyrkhat biang ia ka rai jong ki bad ban buh ia ki nongdie madan sha ka jaka ieng kali ha ka mala ba shapoh, kumba la thmu. Ka seng ka ngeit ba kane kan ai katto katne ka jingpyntngen ia ki nongdie madan bad kan ailad ia ki ban im lang hapoh ka complex.
Ka USCA ka la pynpaw ruh ïa ka jingkyrshan ïa ki bor synshar distrik bad ki bor Pulit, kynthup ïa ka Shillong Municipal Board halor ka jingpyrshang jong ki ban pynduna ïa ka jingkhapngiah ha ka jaka ba thnem ka khaii pateng da kaba shimkhia ïa ka jingjyllei jong ki nongdie madan ha surok.
Ka seng ka ngeit ba kane ka jingleh ka long kaba donkam ban pynthikna ba ki nongleit nongwan kin lah ban iaid laitluid ha ki jaka khaii kiba la khapngiah lypa.