Ka imlang sahlang, ka trei ka ktah, ka khaii pateng, ka shakri paidbah bad kiwei pat ki bynta jong ka jingim briew ka long kaba donkam. Kumta khnang ban pyniaid shaphrang ia ka kam bad ban ioh ia ka jingiatreilang jong baroh kiba iadonbynta ha ka, ka long kaba donkam shibun eh. Ha baroh kitei ki bynta donkam ia ki nongialam kiba stad bad kiba shemphang ban pyniaid beit ia ka kam. Ki nongialam ki dei ban long ki briew kiba don ka jinglah ym tang ha ka thoh ka tar hynrei ha ka kren ka khana bad ha ka kam kaba iadei bad ki paidbah, ne ki ophis ba iadonbynta lang. Ka jingdon ka kyrdan pule kaba biang ka iarap shibun eh ban long ki nongialam hynrei ka sap kaba shong tynrai ha u ne ka ki long ki bynta ka jingkyrkhu U Blei. Kito kiba la don lypa ia ka kyrdan pule kaba biang ki lah ban hikai da kaba suk ia ki jingdonkam bad ki kyndon kumno ban long ki nongialam. Baroh ki don la ka jong ka jong ka sap bad kam dei eh tang ha ka kam trei paidbah hynrei wat ha la i jong i rympei iing ruh donkam ban don ki nongialam.
Ka jingdon jong ki seng bapher bapher ka iarap shibun ha kaba pynmih ia ki nongialam ha ka imlang sahlang bad ym lah ban len ba bun na kito kiba la don ha ki kam nongialam la kham katto katne por ki long shisha ki briew kiba tbit ha ka kam ban shakri paidbah bad kyntiew ia ka jinglong bad jinglah jong ki. Hynrei ym lah ban len ba katba nangmih ki sngi ki seng trei mon sngewbha ne ki sengbhalang ki la nangbun nangbun, kumjuh ki shnong ki thaw ki nangheh nangheh bad ka por ba dawa ban don ia ki nongialam. Katno ka long kaba sngewsynei ban iohi ba bun na kito kiba la shah pyntynrong ban long ki nongialam wat la ki don eh ka mon ban bah ia ka kam hynrei kim don bad ki jingtbit namar ba kim pat shym la ioh satia ia ki jinghikai kiba dei biang kumno ban trei ia ka kam kum ki nongialam. Kine ki long na baroh ki liang naduh ki nongialam shnong haduh ki nongialam ia ki sengbhalang ruh kumjuh. Kumta haba ki leit ban donkam sha ki ophis ne ki tnad kiba ki donkam ki shem jingeh shibun bad ki duh ia ka jingithuh ba ki dei ki nongialam.
Ha man la ki seng ba kynthup naduh ki seng Khaii, Sengbhalang, ki nongkitkam shnong, ki sports club, ki seng samla pule bad kiwei pat ki seng ba bun jait, la ju jied ia ki President, Secretary bad kiwei pat ki nongkitkam ha la ki kyrdan kyrdan bapher bapher. Bun na kitei kiba shah jied ban long nongialam ki shem jingeh shibun bad ki dang hap ban ioh jinghikai ryngkat ryngkat na ki kam ba ki kit. Ha ka jingshisha kito kiba la shimti ia ki lyngkor ki la dei ban don lypa ia ka jingtip bad ka jingshemphang bad kumno kin trei kam kat kum ki kyrdan ba la jied ia ki.
Kumta ka long kaba donkam ba kito ki nongialam kiba la tbit bha ki dei ban pynsngewthuh sha ki nongshim pateng jong ki ia kiei ki kamram bad ki iktiar jong ka kyrdan nongialam khnang ba kiba shimti hadien jong ki kin ym shem jingeh. Ka long kaba donkam ba baroh ki nongialam bad ruh baroh ki dkhot la ka long naduh ki kam shnong kam thaw haduh ki kam sengbhalang ba kin don ia ka jinglah ban trei ia ka kam bad khamtam ha kaba iadei bad ka jingiadei bad ki paidbah ne ka public relations. Ka kot khubor ka dei ka atiar hapdeng jong ki paidbah bad kine ki seng bapher bapher kumta ka long kaba donkam ban don ka jinglah ban phah ia ki Press Release (shithi sha ki kot khubor) bad ruh ban thoh sha kiwei pat ki tnad treikam kaba dei biang khnang ba ka kam shakri paidbah kan long kaba iaid beit. Ka jingtbit jong ki nongkitkam ban pynkhreh ia ki Press Release ne ki shithi sha ki tnad ba don ka jingiadei naduh ki tnad sorkar ne ki para seng ba iatrei mon sgnewbha, kiba dei biang kan pynshlur ia ki ban leh ia ki kam kiba ai jingmyntoi ia ki paidbah bad ki kot khubor hi barabor ki long ki sangot sha ki paidbah.
