Nongstoiñ, Nailar 4: Ka jingbym lah ban pyndep jong u kontraktor ban shna ïa ka jingkieng ha phod Thre kaba pynïasoh ïa ka surok na Upper New Nongstoiñ sha Tiehsaw, kaba la sdang ban shna naduh u snem 2003, ka la wan rah shibun ki jingeh ïa ki paitbah kham tam ïa ki khynnah skul jong ka KJP Synod Sepngi Higher Secondary School kaba don ha Tiehsaw.
Ha ka janmiet sngi balang jong kane ka taïew ki nongïalam jong ka FKJGP Nongstoiñ circle, ki la leit ban jurip bad la lap ba nalor ba ym shym la trei pyndep ïa ka jingkieng, ka surok ruh ka long kaba khohruh khohram bad kaba sniew haduh katta katta.
U samla A.Dkhar Disciplinary secretary ka seng haba ïakren bad ki nongthoh khubor, u la ong ba ka jingbym pyndep jong u kontraktor u ba pyntrei ïa ka jingkieng ka la pynlehraiñ ym tang ïa ka PWD hynrei wat ïa ka sorkar hi ruh. Nalor kata u la ong ruh ba ka seng ka la leit ban ïakynduh bunsien ïa ki ophisar ka PWD. Hynrei ha man ba ki leit kitei ki ophisar uwei hadien uwei ki la kular ban shimkhia bad ban pyntip sha ka sorkar ba kan mang pisa thymmai na ka bynta ban shna ïa katei ka jingiieng hynrei haduh mynta ym pat ïohi dak ei ei.
Utei u nongïalam ka seng u la ong ruh ba ha kine ki taïew ba la dep, ki la leit ban ïakynduh ïa u Executive Engineer jong ka PWD Nongstoiñ Divission bad ki la buh ruh da ka jingthoh ban pynkynmaw ïa u, ba un shimkhia bad ban pynkynmaw biang sha ka sorkar, ba kan phah pyndep noh ïa katei ka jingkieng, ha kaba utei u ophisar u la kular ba un sa pyntip sha ka sorkar ba kan mang pisa thymmai noh na ka bynta ban shna pyndep ïa katei ka jingkieng.
U la ong ruh ba ka jingbym don jingkieng ha katei ka jaka, ka buh ha ka jingeh kaba khraw ïa ki khynnah skul jong ka KJP Synod Sepngi Higher Secondary School, kaba don sha shililang jong katei ka phod Thre. Nalor kata u la ong ba mynta ka la don sa ka College jong ka KJP Synod Sepngi kaba dang shu plie shen. Kumta ka buh jingeh haduh katta katta ïa ki samla pule khamtam ha ka por lyiur namar ba ka um ka heh bha.
U la ong ba ka seng da ka jingsngewkhia ka kyntu ïa ka sorkar ba kan mang pisa noh kloi katba lah, na ka bynta ban phah shna biang ïa katei ka jingkieng. Lada ka sorkar kam leh ei ei, ka seng kam banse ban ïaid da kawei pat ka lynti na ka bynta ka jingmyntoi jong ki paitbah.
