Ka jingduk, jingïapait ki longïing bad jingkyrduh kam ki daw bah ba jyllei ka kam khaïi briew ha Meghalaya: DGP
Shillong, Lber 31 : U Director General of Police (DGP) ka jylla Meghalaya u LR Bishnoi u la ong ba ka jingduk jingkyrduh, ka jingïapait ïa para ki long ïing, ka jinghap kit khunrei ka kyntei bad ka jingkyrduh kam kyrduh jam ki daw bah ba jyllei ka kam khaïi briew ha Meghalaya.
Haba kren ha ka State Level Conference halor ka Anti Human Trafficking kaba la long ha Convention Hall, Shillong u la ong ba ki don ar tylli kiei kiei kiba pynlong ïa ki briew ban ngat ha ka shrip kata kawei ka jingbym banse bad kawei ka jingshah tan ne shah pynbieij ha ki briew kiba ïadonkti ha ki kam khaïi briew.
U la ong kiba bun ki samla kynthei bad shynrang ki ju ngop ha kiba kum kine ki kam da kaba shah pynbieij ban pynïoh kam ïoh jam ïa ki. U la ong ka jingduk jingkyrduh, ka jingïapait ïapra ki long ïing longsem bad ka jingbym ïoh kam, ka jinghap kit khunrei ka kynthei ki long ki daw kiba pynlong ïa ki briew ban ngop kloi ha ka shrip jong kito kiba pynïaid ïa kine ki kam khaïi briew.
Don pat ruh ka khep na ka daw ka jingshah ban beiñ ne thombeiñ ha ka synshar khadar kum ki jaidbynriew Rogingyas bad kiba phet wir na kawei ka jaka sha kawei ka jaka ki ngat kloi bha ha kane ka shrip.
U la ong kiba shah tan shah pynbieij ki dei kito kiba ngop ha ka jingtyrwa ai kam ai jam bad mih sha bar hynrei ki ngat ha ka shrip. Kum ha Punjab, ki samla ki shah pynbieij ban ïoh kam sha Canada hynrei hadien ki sa tip ba ki la ngat ha ka shrip ki nongkhaïi briew.
U la ong ki briew kiba donkti ban leh ïa kane ka kam ki dei kiba don ha ka bor kiba kamai spah na kaba pynïaid ïew ïa kane ka kam khaïi briew. U la ong ba bun ki samla kiba shah ïalam sha Mumbai ne sha ki nongbah ba heh ban leh ïa ki kam modelling hynrei haba khatduh ki ngat ha shrip jong ka kam khaïi met. Namar ha kitei ki jaka ki don ki briew kiba ïadon kti ban pynïaid ïew ïa kane ka kam kiba biang ka pisa tyngka bad ki nang kumno ban pynngop ïa ki samla kynthei ban ngop ha kine ki jait kam.
Ban lap dien ïa kiba pynïaid ïew bad kiba ngop ha ka jingpynbieij ka donkam ka jingïatrei lang naduh ki bor pulit, ki seng bhalang, ki paidbah hi baroh bad haba ïoh ruh donkam ban bud dien bha ban pynngat kyndon ïa kiba donkti namar bunsien kiba shah pyngngop ki dei kiba duk ba kyrduh bad kim don pisa tyngka ban ïakhun katba kiba pynïaid ki dei kiba don bor bad kiba don ba biang ka pisa tyngka.