Shillong, Lber, 31: U District Magistrate bad District Election Officer (DEO) ka East Khasi Hills District u la pynmih da ka hukum ban pynjari ïa ka Section 144 CrPC ha baroh kawei ka East Khasi Hills District ban mana ïa kino kino ki kynhun kiba thmu ban pynlong ïa ki jingïakhih paidbah.
Hadien ba la pynbna da ka Election Commission of India ban pynlong ïa ka elekshon ba la pynsangeh ha Sohïong Constituency ka ban sa long ha ka 10 tarik, Jymmang, 2023, ka Model Code of Conduct (MCC) bad kiwei kiwei ki jingbthah jong ka Election Commission ki la treikam mardor hapoh ka East Khasi Hills District baroh kawei. Namarkata, u District Magistrate & District Election Officer jong ka East Khasi Hills District u la pynjari da ka Section 144 CrPC kaba mana ban pynlong ïa kino kino ki jingïakhih, da kino kino ki riewshimet lane ki kynhun bapher bapher hapoh ka East Khasi Hills District.
Ïa kane ka hukum la pynmih hadien ba la ïoh jingtip ba ki don katto katne ki kynhun kiba la thmu ban pynlong ïa ki jingïakhih paidbah kum kaba shah thngan, ïaid paidbah bad kiwei kiwei hapoh ka District bad lada ailad ban pynlong ïa kine ki jingïakhih, kan pynthud ïa ka shongsuk shongsaiñ bad ka ban lam haduh u pud ka jingduh ei ki mynsiem briew bad ka jingjulor ki jingdon jingem, ka ban ktah ka jingïaid beit ïa ka jingpynlong ïa ka elekshon ba la pynsangeh ha Sohïong Constituency, lada ym khanglad noh mardor.
Kane ka hukum kan treikam noh mardor bad ïai treikam tad haduh ban da pynbna da kumwei pat.
