Laisnem hadien ba la thaw ïa ka party bad san bnai hadien ba ka Voice of the People Party (VPP) ka thaw record da kaba sar lut naphang ïa ka election MP sha Lok Sabha Shillong Parliamentary seat, da kaba tam kput la jan 4 lak duna pyrshah ïa u kyrtong ba jan tam eh jong ka Congress, ki dak ki shin ki paw da kawei pat ka rukom ka bym da itynnad satia hakhmat ki nongkyrshan ba don burom, ki riew rangbah, ki longkmie kiba da thew da woh (ym ïa kito ki nongkyrshan kiba shu wan kumba kynting ka ‘erlangthari nangno re bad ki jah noh suki).
Ka mat ban jied kyrtong sha ka KHADC & JHADC kam da ïapher than na kaba sam doh kyndang hadien ba thaw sorkar, namar kin don beit ki jingbymhun hangne hangtai. Kata, te yn pynhun hi tang ïano lymda ka nongrim baskhem ka tehlakam ïa ki bor jingsngew jong u briew. Hadien ka State Election Committee jong ka party ka la pynbna paidbah ïa ki kyrtong, bluit ka mih ka jingbymhun u MLA ka North Shillong ïa ka rai jong ka SEC ha rynsan ki lad pathai khubor (social & print media) namar u kyrtong na ka Jaïaw-Mawprem Constituency bad na Mawkhar-Pynthorumkhrah Constituency, irr sdang khih jingmut ki paidbah, kumno kane ka jia bad shano kan lam? Ngi shait ïohsngew na ki politician ba la ih bha ka jingtreikam, haba don ka huri hura hapoh ka party, ki shait ong, hooid ka lah ban don ka jingïapher shi-ïing shisem tangba ngim ju poi pat shaduh u pud ban thang pat ïa ka ïing. Kaba mut ki pyrshang ban ïathir tang hapoh ïing lajong, hynrei hangne ka mih jingeh khyndiat ka long ba la pynpaw pyrshah sha ki media. Ki social media lei kiba nang ban pynïashrut, ha ka jaka ba kin theh umpjiah ki nang pyrsat pynrhem pynban ba ka ïing kan ingkhong syndon.
Kum u nongthoh u bym ïashah liang, hooid u Dr Batskhem Myrboh, nongaiktien ka VPP u la dep pynshai paidbah ba ka jingjied kyrtong kam dei ban ïaid lyngba ki MLA ne MP, ka dei beit ka kam jong ka SEC ban peh (ban ktait), namar ka la don ka kyndon ha ka Art. 5 (3) jong ka Riti Pynïaidkam katei ka party kaba ong, ym dei ban ïasyllok shwa ïa uno uno u MLA na ka bynta ka jingjied kyrtong ban ïakhun election.
Hooid, katkum ka jingkren jong u Bah Adelbert Nongrum, u ong ba u la pynsngew ha ka Executive Committee jong ka party ha shwa ban pynbna ïa ka list, ba um hun ïa ka rai ha Jaïaw & Mawkhar hynrei ka SEC ka ïaid beit shakhmat. Ha kawei pat ka liang, lehse ka State Election Committee ka ïohi ïa u kyrtong ba u MLA ka North Shillong u la kubur, kata u Bah Strong Pillar Kharjana u dei u kyrtong uba la shah rem teng ha ka election MDC ba la dep. Kum ka jingpynkynmaw, la jied ïa u samla Denzil Raynard Chen kum u kyrtong ka party na Jaïaw- Mawprem. Ka don ruh ka jingong, ba ka party lehse ka ïohi jngai lypa na ka bynta ka jylli ba kham ïar, ba u Denzil un dei uwei u briew uba bit ban ïa aireng ha ka election MLA 2028 na ka Shillong West, mano ban tip.
Ka jingjied kyrtong ka Jowai North Constituency da u Bah Andrew Awhoi Shullai ruh ka don ka jingkynthoh na kiba bun, namar ba um dei shuh u candidate uba dang sdang speh (fresh) hynrei u dei uba la kyntiap seng na kawei ka party sha kawei pat. Ki briew ki artatien, tip lada u jop, un ïaineh neem ha ka VPP. Namar nalor bym don ka Aiñ kyntiap seng ha District Council, sa ka jinglehmon ki MDC kum kita ki Aya Ram ki Gaya Ram, te phin shaniah ïano, ngi dang pyrkhat ba ka party kan da peh sani bha ïa kito kiba tyrwa ban long kum ki kyrtong kumba ki nongïalam ki khlei kham mynshwa.
Ha kawei pat ka liang, kane ka jingjia ha Jaïaw ka bha palat, namar lada ki jingthmu jong u briew kin long kin jia beit kumba u thmu, un nym kheiñ snep ïa kiwei. Hynrei lyngba kum kine ki jingjia, hap ban pyrkhat, ban pynbeit shuh shuh ïa kaba kdor bad shtah shuh shuh ïa kaba at bad lpe ïa kaba pei. Kumta, kane ka period, kan dei ka jingkyrkhu bympoi pyrkhat ïa ka VPP (ablessing in disguise). Ki nongïakura ba pawnam jong ka pyrthei kum ki jong u Mohammad Ali, Mike Tyson bad kiwei kin nym lah ban long Champion lymda ki shah buh shwa shi kura ar kura na u khmut lajong. Ka dei ka por ïa ki nongïalam jong ka VPP ban phaidien khyndiat namar la shu ïathew beit tang shakhmat, teng teng klet ha ka jingkyrkieh ban phai shadien jia aïu. Ka VPP ka dei ban sngewthuh ba ka dei ka sohpdung kaba hakhmat duh jong ki party ba pyrshah ïa ka, naduh NPP, Congress, UDP & HSPDP. Ki khnam ki thew beit beit sha ka sohpdung jong ka, lada bakla wiak, khlem pep kan pei bylliang. Ka sem ka khynñiuh khamtam haba ka ‘erïong ka khie napoh ïing, ka lah ban shah jynrat ruh lymda la pynskhem bha ïa ki snar jong ka. Ka jingkynthoh jong u Joanes Lamare bad uwei u heh ki samla pule NEHU pyrshah ïa ka party dangshen lyngba ki social media ka dei kawei na ki mat ba ka party ka dei ban shimkhia, ym ban ai mukotduma ïa kitei hynrei ban pynlong mawkyndon ïa ki jingkynthoh pyrshah jong ki. Namar ka jingmut jong u paidbah hi hangno hangno kam ju ïaineh, ka kham shim por ban khluit ban ka stet bha ban pjah. Ka long kumta, wat ha ka por u Jisu bun kiba ïohmad ïa ki kambah ha ka jingim jong ki hynrei ynda la poi ha ka jingbishar hakhmat u Pilate ki dei kito kiba pyrta ‘sahnarphna, sahnarphna ïa u’.
Kumta, ban skhem ka nongrim bad ban bsuh ha dohnud jong uba bun balang, dei ban long kiba stad bad ki sngap lang ïa ka sur u paidbah hi, namar ka story jong u Shakespeare ha u Julius Ceaser ka ong ha ka ktien Latin “Vox populi vox Dei”, ka Sur u paidbah ka dei ka sur Blei. Ki don katto katne ruh ki mat kiba u Bah M.A. Passah u la ai jingmut sha katei ka party kumba la saphriang ha social media, ki long kiba sngewdei.
Khatduh eh, ka VPP ne ka party PRAH kumba la tip paidbah baroh baroh ka dei ban sngewthuh ba ki nongshun jong ki, ki peit kliaw lano kin ïoh ban khyllie ban pynngam syndon lada ki lah. Hynrei, kawei pat ka mat kaba pynbampong ïa ka jaidbynriew ka dei ka jingpihuiñ bad jingbym ïaishah. Lada shong lei ha ka Liang pyrshah te ki sngew kumba ki khlem long MLA eiei. Dei na kata ka daw ba ka raibi ‘u Thlen Khasi u bam tang ïa u Khasi’ ka dei ka pharshi kaba dei ban rat dyngkhong. Lada long nongïalam u Garo, ka sorkar jong u ka neh ym tang san snem hynrei palat ban ïa kata, naduh u Capt. W.A. Sangma, Purno Agitok Sangma, Salseng Marak, Mukul Sangma & Conrad Kongkal Sangma, ñiew keiñ ïa ki jong ngi, ym don ba neh namar katei ka raibi haneng. U Garo ha kata ka liang lada u ïashrut katno katno ruh, ynda la ïasah tang para ma u, u ïa burom ïa ki nongïalam jong u. Kumta, ha kano kano ka seng, la ha ka niam, ka sengbhalang ne ka saiñhima sima, lada ym lah ban kheiñ duh ïa ka jong nga bad ban pdiang ïa ka rai kaba dei (right decision) jong kiwei te ym poi shano shano ruh. Ki paidbah ruh kim pat dei ban khih jingmut katba kim pat ïoh ban tynjuh ïa ka VPP kum ka sorkar Meghalaya ne sorkar District Council kumba ki angnud. Kumta, haba ka lyer ka la sdang ban jynrat, ka VPP ka dei ban pynskhem ïa ki Snar bad ki tyllai jong ka, lym kumta, ka jingkyrmen ban pynkylla dur ïa ka synshar khadar kaba khuid ba suba, kan shu bijai ei.
