Shillong, Naiwieng 25 : Ka Sorkar Jylla ka la mang 500 klur tyngka ban pyntrei ïa ka New Shillong Township Water Supply Scheme.
Haba ïathuh ïa kane mynta ka Lah Sngi U Blei, u Myntri ka PHE u Marcuise N Marak ula ong “ ïa ka New Shillong Township Water Supply Scheme, ngi la dep pyllait ïa ka tender ba kot kumba T.500 klur. Ngi la dep ai ïa ka work order bad ka kam kala sdang ïaid”.
Halor ka jingsngewkhia jong ki contractor trai jylla, u Marcuise ula ong ba kan long kaba eh ban ai kam lang ïa ki contractor trai jaka lada ka Sorkar ka pyntreikam ïa ki kor ki bor ba thymmai ka juk ha ba pyntreikam ïa kum kine ki project.
“Ngi ïatip bha ïa ki kam kiba donkam da ki contractor jong ngi ruh hynrei na ka bynta ka jingtreikam kaba biang bad na ka bynta ka lawei jong ka Jylla jong ngi, ngi hap ban ïaid kat kum ki kor ki bor ka juk bad lada ngi ïaid kat kum kine ki kor ki bor thymmai, kan long kaba eh ban aikam lang ïa ki contractor trai jylla” ula ong.
“Ngi la pyndonkam ïa ki kor ki bor ka juk mynta. Ngi la pyndonkam ïa ka Skada System ïa ka NST ha kaba ka Internet kan treikam haba bthei ki pipe, ka ban pynsuk ïa ki Nongtrei ka PHE ban lap bad leh ïa kaba donkam khlem ka jingpynslem. Na kata ka daw ngi donkam ban pyndonkam ïa kine ki kor ki bor ka juk kaba ki contractor jong ngi kim pat don ïa ka jingnang jingtip” bynrap u Myntri.
Haba kylli, u Marcuise ula ong ba ka Tnad kala buh ïa ka jingtyrwa ban ïoh jingmynjur na ka Kynhun Myntri ban leh eiei halor ki jingeh ba ïadei bad ka jingsam ïa ka umbam umdih ha Sor.
“Ka PHE ka dei kaba peit ïa ka jingsam um ba bun bad ka SMB ruh ka don bynta ha ka jingsam um. Ngam lah ban ong eiei halor ka rukom pynïaid ïa ka jingsam um. Naba bun kiei kiei kila mih, ngi hap ban ïakren bad u Myntri Rangbah bad u Myntri ka Tnad Urban Affairs, ngi la pyrshang ban wanrah ïa ka rukom treikam ba thymmai la ka dei kaba lah pyntreikam ne em, kane kan dei ka kam ka ban sa ïakren hapoh ka Kynhun Myntri. Kum u Myntri ka PHE, nga la buh ïa kine ki kam hakhmat u Myntri Rangbah bad u Myntri ka Urban Affairs. Lada ka Kynhun Myntri ka pdiang, ngan sa lah ban batai ïa phi shaphang ka rukom treikam kaba thymmai” ula ong.
