Shillong, Naiwieng 25: U MP ka Tura Constituency na ka seng congress, u Saleng A Sangma u la kyntu ïa ka tnga jong u Myntri Rangbah bad kaba dei MLA kaba dang shu jop thymmai napoh ka Gambegre, ka Dr. Mehtab Chandee ban ïeng skhem ban pyndep ïa ki jingkular ba ki la pynpaw sha ki paidbah.
“Nga kyntu ïa ka Madam Chandee naba ki don hapoh ka sorkar bad kumjuh ruh ba ki la buh bun ki jingkular na ka bynta ki nongshong shnong ka Gambegre. Ki dang don bun ki kam kiba dangsah bad nga ngeit ba kin peit ïa kine ki kam. Ki don ki samla kiba donkam ïa ki kam ki jam bad nga kyrmen ba kin shim khia bad ban pynïoh ïa kaei kaba ki la kular,” ong u Saleng uba long ruh u MLA barim napoh Gambegre constituency uba la iehnoh ïa ka kam hadien ba u la jop ïa ka elekshon MP napoh Tura constituency.
Haba ong ba watla ka congress kam don ha ka bor, hynrei ki briew bun bha kiba la mih ban vote ïa ka party, u la ong, “Nga ai khublei ïa ki nongshong shnong ka Gambegre halor ka jingïashim bynta jong ki bad watla ka Congress ka khlem ïoh ka jingjop hynrei nga ai khublei naduh mynsiem ïa ki nongshong shnong ka Gambegre ba ki la don bad ka party.”
