Ka Internet ka dei ka atiar lada pyndonkam daka jingkitkhlieh ong u samla pule ba wan ha ka kyrdan ba Saw

Shillong, Iaiong 7 : U samla Nathaniel Mantre Laloo, uba ïoh ïa ka kyrdan ba Saw ha ka eksamin Secondary School Leaving Certificate (SSLC), ula ban jur ïa ka jingnang ban pyndonkam da ka jingkitkhlieh ïa ka kor Internet.
“Ka pyrthei internet ka dei ka jaka kaba don jingma ïa ki samla ka shong eh ha kano ka rukom phi pyndonkam ïa ka” ong u samla Nathaniel uba dei u khynnah skul ka Sevenset Higher Secondary School, Shillong.
Ula ïathuh ba kumno u pyndonkam ïa ka Internet bad ong “Nga pyndonkam tang na ka bynta ki jingpule, buddien ïa ki news bad peit ïa ki channel ba kren halor ka science. Nga buddien ïa ki news channel, scientific channel bad dei lyngba kane ba nga ïoh ïa ka jingshemphang bad pynkhreh ïalade na ka bynta ki jingïaleh ba hadien”.
Ka jingkyntu u samla Nathaniel ïa la ki paralok ka long ba kin pyrkhat bha ïa ki jingpyndonkam ïa ka internet. “Phim lah ban pyndonkam Instagram ha kane ka rta, hynrei baroh ka shong eh ba ha kano ka rukom phi pyndonkam, pynlong ïa ka kum ka atiar na ka bynta ki jingpule, ym ki jingpynwit”.
Haba pynpaw ïa ki jingkmen, ula ong “Ha kane ka khyllipmat, ka jingkmen kala long palat,nga hap ban ai ka burom sha U Blei, ki Kmie Kpa, ki Nonghikai bad ka skul namar ka jingkyrshan jong ki”.
Halor ka jingpynkhreh ïa ka eksam SSLC, u Nathaniel ula ai jingmut “ Wat pynkut ïalade ha ki kynta, pule haba phi sngew kwah pule,shimkhia ïa ka. Lehkmen ïa ka jingim ha skul, leh ïa kaei kaba phi ieit, hynrei pynbeit ryntih ïalade khamtam ha ki khyndiat bnai ba jan kut”.
U samla Nathaniel ula ïathuh ba u don jingthmu ban leit pule ha ka laiñ commerce bad ban long u Chartered Accountant, da ka jingthmu ban ïarap ïa ki riewlum trai muluk.
“Nga tip ba ka lah ban pynkyndit, hynrei nga kwah eh ban trei ïa ka kam kum u Chatered Accountant bad ïarap ïa ki riewlum trai muluk” ula ong.
Haba kylli ïa ka jingkhmih lynti, u Nathaniel ula ong “Ki nonghikai bad ki Kmie Kpa jong ngi kila khmih lynti, hynrei nga kwah ban ai ka jingkyrmen kaba palat ïa ki.Nga la aiti lut bad nga kmen bad kane ka result ba nga la ïoh”.