Ka dei ka sien kaba nyngkong eh ba u Dr Mukul un ïaroh ïa ka Dorbar Mang Tyngka : Sawkmie

Shillong, Lber 16 : U Bah P.T Sawkmie, MLA barim u la ong ba ka dei ka sien kaba nyngkong ba u nongïalam ka Liang Pyrshah u Dr. Mukul Sangma u ai jingïaroh ba ka Dorbar Mang Tyngka kaba dang shu dep ka long kaba seisoh bad kaba biang palat haba ïakren ïa ka Budget bad kiwei.
Kane ka paw ïa ka jinglong ïar jingmut jingpyrkhat jong une u rangbah kum u nongïalam, ong u bah Sawkmie.
U la bynrap, “Kum ki nongïalam ki don ki issue ba hap ban ïa pyrshah sorkar, ki don ki issue ba hap ïaroh ïa ka sorkar, ym ban shu beiñ naphang.”.
U pynpaw ruh ba ka Dorbar Mang Tyngka kaba dang shu dep ka biang namar ka sorkar ka la wanrah ïa ka budget 2025 kaba ka mang pisa kaba ki paidbah kin ïoh jingmyntoi na kane ka Mang Tyngka.
Shuh shuh kaba ki paidbah ki ïohi ka long ba ïa ki issue bapher bapher ki MLA ki ïoh ban debate ne ïatai hapoh ka assembly, ki paidbah ki sngewkmen ban ïohi ba kane ka sorkar kaba mynta ka don ka thong ban pynlong ïa ka Meghalaya kaba roi kaba par, ong u bah Sawkmie.