Ka Congress ka ïeng ban ïada ïa ki Khristan, ki Rit Paid bad ki Riewlum : Vincent Pala

Shillong, Lber 17 : U President ka MPCC uba long ruh u MP ka Lok Sabha na ka Shillong Parliamentary Constituency u ma Vincent H Pala u la ong ba ka Congress ka la shim ïa ka rai kaba biang bad dei eh ban pynïakhun kyrtong na baroh ar tylli ki Parliamentary Constituency ha ka jylla namar ka Congress ka dei tang ma ka ka party kaba ïeng ban ïada ïa ki Khristan, ki Rit Paid bad ïa ki Riewlum bad na kata ka daw kam shym la ïehnoh ïa ki paid Achik ne Garo da kaba rai ban pynïakhun kyrtong beit na Tura ruh nalor nangne na Shillong.
“ Ka Party ka la shim ïa ka rai kaba dei bad biang eh ban pynïeng kyrtong na baroh ar ki Parliamentary Constituency kata na Tura bad Shillong ha kane ka Election Lok Sabha kaba ka jingïathep vote kan long ha ka 19 tarik Iaiong 2024 namar ngim lah ban ïapeiñ ïa ka lawei jongka party ha ka jylla” ong u Ma Pala.
“ Ha nga shimet nga sngew ba lada hap ban ïa pynbeit sngewthuh bad ka INDIA Block dei ban leh tang ha ki jylla ba heh kum ka Assam, West Bengal ym ha ki jylla ba rit kum ka Meghalaya. Nga tharai ka TMC ka ïakhun na ka bynta ban ïoh suhthied bad kumjuh ruh ym lah ban len ba ka Congress ruh ka kwah ban ïai suhthied bad skhem ha ka jylla Meghalaya namar ngi don ki nongkyrshan ba ieit ha ri lum Garo bad kumjuh ruh ha ri lum Khasi bad Jaintia” ong biang une u Nongïalam ka Congress.
U la ong shuh shuh “ Kumba long ïa mynta ha Jaintia Hills ngim don MLA, ha Khasi Hills ngi don saw ngut bad ha Garo Hills ngi don uwei. Kumta lada ailad noh ïa ka Garo Hills sha ka TMC khlem pep ka lawei jongka party kan long kaba dum hynrei ngim kwah ïa kane, na kata ka daw ngi la shim ïa ka rai khnang ba ki dkhot bd nongkyrshan jongka party kin ïai im bad ïai neh hapoh ka party”.
U la ong ka Congress ka lah ban ïatrei lang bad no bad no hynrei kam lah ban ïapeiñ ia ka lawei jongka party.
“ Dei halor kane ka nongrim ba nga la lah ban pynkohnguh ïa ki Nongïalam ba halor duh ka party ha Delhi ban pynïakhun beit na ri lum Garo bad kumjuh ruh na ri lum Khasi bad Jaintia. Namar lada ym pynïakhun na Garo ki paidbah kin sa sngewdiaw bad sngew rem ba ki la shah ïeh khun swet ne leh shilliang khmat ha ki nongïalam ka Congress um kum ka BJP kaba dei ka party kaba la shu pnah bad bang tang ka ktien ka thylliej khlem da leh da ki kam. Kumta kumba ngi la rai bad mynjur ruh na Delhi ngi la leh ïa kane na ka bynta ka lawei jong ki paidbah ka jylla Meghalaya” pynkut u ma Pala.