Ka CAA ka dei ka politik taddor jongka BJP ban pharia ïa ki jaidbynriew bad niam : Congress

Shillong, Lber 13 : U Nongïalam ka Congress Legislative Party (CLP) Bah Ronnie V Lyngdoh ha ka sngi Balang ula ong ba ka jingpyntreikam ïa ka Citizenship (Amendment) Act (CAA) ka politik tad dor jong ka BJP ban pharia ïa ki jaitbynriew bad ka jingngeit niam, shuwa ka jingwan ka elekshon Lok Sabha.
“Phi shu peit ïa ka CAA, ka dei ka politik taddor jong ka BJP. Shuwa jong ka elekshon, kila wanrah ïa kane ka ishu tang ban pharia ïa ki briew halor ka jingngeit niam, ïa kaba ngi pynrem jur bha, kaba ngi pyrshah bad ngi kyrpad ïa ki nong India, ki paidbah ka Jylla ba kin ai ïa ki vote sha ka party kaba burom ïa baroh ki niam, ki briew kiban ïada ïa ka riti synshar ka ri, ki briew ki ban pynneh ïa ka riti synshar paidbah” ong u Bah Ronnie.
Ha ka sngi Ba-ar, u Myntri Rangbah ka Jylla Conrad K Sangma ula ong ba ka CAA kan ym don jingktah ïa ka Jylla Meghalaya namar la pyllait ïa ki jaka Sixth Schedule na ka jingtreikam jong ka aiñ.
Haba kynthoh ïa kane, u Bah Ronnie ula ong “Ngin kham sngew shngaiñ lada kane ka long shibynta jong ka CAA rules. Tang da ki jingkren, ngam sngew ba ngi la thikna ba kan ym treikam. To ngin sa ïa peit ïa ka rule ba kila shna la kila pyllait ne em ïa ka Sixth Schedule bad ngin sa ngeit ïa kane”.