Ka ïoh ka kot ka jylla kan kiew lada baroh ki paid nongshong shnong ki ïakiew lang : CM

Shillong, Lber 13 : U Myntri Rangbah ka Jylla Conrad K Sangma, ula ong ba ka ïoh ka kot jong ka Jylla kan kiew lada baroh ki paid nongshong shnong ka jylla naduh ki samla, ki kynthei,ki rangbah, ki nongrep, ki nongsengkam bad baroh ki dkhot ka imlang sahlang ki ïoh bynta lang ha kane ka jingkiew.
U Conrad ula kren ïa kane ha ka CM Elevate Conclave na ka bynta ki nongsengkam ka Ri-Lum Garo kaba long mynta ka sngi Balang ha District Auditorium, Tura, ha ka jingïadonlang u Symbud Lamphang Timothy D Shura, ki Myntri Sorkar bad ka MP Lok Sabha ka Agatha K Sangma.
Haba ai jingkren, u Myntri Rangbah ula ong ba ka Sorkar Jylla ka don ïa ka mishon bad ka jingïohi jngai ban kynjoh ïa ka 10 billion US dollar economy hapoh u snem 2028 bad ban pynïaryngkat kyrdan ruh ïa ka Jylla bad kiwei kiwei ki Jylla bala kiew shaphrang hapoh ka Ri.
“Lada ngim jam shakhmat da kane ka thong, ngin ym lah satia ban kiew bad roi lane ba ka ïoh ka kot jong ngi kan kiew” ula ong.
Ula pyntip ba ha kine ki shisnem shiteng bala leit, ka ïoh ka kot jong ka Jylla kala kiew na ka T.45 hajar klur sha ka T. 56 hajar klur haba ban jur ïa ka jingdonkam ban pynkhlaiñ ïa ka jingseng kam bad ka jingpynlut ban lah pynkhlaiñ ïa ka ïoh ka kot.
U Myntri Rangbah u pyntip ba lyngba ki skhim bapher bapher jong ka CM Elevate program, ki nongïoh jingmyntoi kin ïoh haduh 50% ka subsidy lane palat na ka jinglut jingsep jong ka project.
Ula pyntip ba ka CM Elevate Program kan ïai bteng manla u snem bad kyntu ïa ki samla ba kin shim kabu ïa ki jingmyntoi ba kin ïoh na kane ka prokram.
U Conrad ula kren ruh halor ka Floriculture Mission kaba la pyllait dang shen bad ong ba kane ka Mission kan pynkhlaiñ ïa ka kam rep syntiew hapoh ka Jylla.
Ula pyntip ruh ba ka IT Park ha Tura ïa kaba la dep ban ai work order, kan lah ban pynïoh kam haduh 5000 ngutki samla ka Tura bad ka ri lum Garo baroh kawei.
Ha kane ka sngi u Myntri Rangbah ula sam ruh ïa ka shithi thungkam ïa ki Village Data Volunteers bad aiti ïa ka work order jong ka Bio-mining ha ka jaka bret niut ka sor Tura, kaba don ha Rongkhon Songital.
Nalor kine, ula sam ruh ïa ki shithi pyllait song pisa sha ki nongïoh jingmyntoi jong ki Agri-Response Vehicles, Agri-Warehouse, Common Facility Centre, Piggery, Poultry bad Goat Farming schemes hapoh ka CM Elevate bad ki sanction letters hapoh ka Floriculture Mission.