Ha ka jingkhynra ïa ka ïing sah kurup ki Pulit ka Ribhoi ïa ka pistol, ki lama ka HNLC bad ki tiar pynbthei
Thong ki nongïalam na Bangladesh da ka pisa bad kali thymmai ban pynbthei bom IED
Shillong, Lber, 13: Ki Pulit ka Ribhoi District kiba la pynlong ïa ka jingtohkit kaba bniah bha ha kaba ïadei bad ka Case kaba la rejister ha Nongpoh Police Station hapoh ka Section 120B/121A jong ka Indian Penal Code pule lang ruh bad ka Section 10/13/18 jong ka UA(P)Act bad ka section 5/6 Explosives Substance Act, ha ka sngi Balang ki la ïoh kurup kawei ka pistol, bun tylli ki Gelatin Stick, ki Detonator bad ki Ignition Fuses bad kawei ka lama jong ka seng HNLC bad kiwei kiwei ki jait tiar.
Ka jingïoh kurup jong ki Pulit ïa kine ki lama bad ïa ki tiar pynbthei ka long hadien ka jingïalam lynti jong uwei na kiba la shah kem sha kawei ka ïing ba la buhrieh ïa kine ki tiar be-aiñ.
Ki Pulit ki la ïathuh ruh ba ki dei kine kijuh ki nongtrei barieh kiba la pynher ïa ki lama jong ka HNLC ha ki snem baladep da ka jingbthah jong ki nongïalam ba phetrieh ka seng kieng atiar HNLC na Bangladesh .
Kane ka kam runar ka la paw pyrthei hadien ba ki nongïalam ba la phetrieh sha Bangladesh ki la bthah ïa ka kynhun treikam barieh. Nalor kata, la ai khusnam ruh da ka pisa bad kynthup ruh ïa ki kali ba thymmai sha kine ki nongtrei barieh ban pynbthei ïa ki bom IED, la ong shuh shuh u kyrwoh ba u SP ka Ribhoi Jagpal Singh Dhanoa.
Ka jingtohkit halor kane ka dang ïaid shakmat.