Shillong, Nailur 24: U Director General of Police u Dr LR Bishnoi u la ong ba na ka liang ka tnat Pulit jong ka sorkar jylla kan ym lah ban behthong ïa baroh ki trok ba ïaid ha surok ban tohkit la ki dei kiba kit dewïong be-aiñ ne kiwei pat ki jait jingkit.
Ha ka jingiakren bad ki lad pathai khubor u la ong ba na ka liang ka tnat Pulit hi ka la buh ruh ïa ki katto katne ki Patroling Point ha ki bynta ka surok bah ban teh lakam ïa ki jingkit dewïong be-aiñ hynrei u la iathuh ba na ka liang ki Pulit kim lah satia ban buh ia kum kine ki ha man la ki jaka namar ka jingduna palat ki pulit ha ka jylla. Shuh shuh u la thuh ba na ka liang ki pulit kiba don ha kane ka Patroling Point ki pyrshang ban leh la ka kamram ban pynthikna ba kan ym don kano kano ka jingïaid be-aiñ ïa u dewïong.
Haba ïadei bad ka jingkynnoh ba ka don ka jingbam pisa da ki Pulit ba ap ha kine ki Patroling point na ka liang u DGP u la kyntait ba ka don kaba kum kata.
Haba jubab halor ka jingbym treh register ki pulit ka Mawryngkneng ïa ka ejahar ba la ujor da ka HITO pyrshah ïa ki 18 tylli ki trok na ka liang u DGP u ong ba un sa pan jubab ïa kane na ka thanat halor ki daw ba kim treh ban register ejahar.
