Ka bamsap ba shyrkhei tam ka dei ha ka sorkar MDA : Rahul Gandhi

Shillong, Rymphang 22 : U Nongïalam ka Congress uba dei ruh u MP Lok Sabha u Rahul Gandhi u la ther tyngeh mynta ka sngi ïa ka sorkar MDA ba la ïalam da u Myntri Rangbah duh u Narendra Modi da kaba kynnoh ba kane ka sorkar ka dei kaba shyrkhei tam ka jingbamsap ha ka histori jongka ri India.
U la ai nuksa ïa uwei u heh saipan uba dei u paralok ba ïajan tam bad u Modi u Adani uba la kiew kynsan ka spah jongu tang hapoh shisnem namar na ka kyrdan ba 609 napdeng kiba riewspah tam ha pyrthei tang hapoh shisnem u la kiew sha ka kyrdan Ba Ar. Une u briew u la pynïaid lut ïa ki kadlieng rud duriaw, kad liengsuiñ, u tei jingtei,u ïoh kontrak ha ka tnad kam ïada ri, u pynïaid hi ïa ka kam khaïi soh apple ha Himachal Pradesh bad la jan man la ki kam khaïi pateng u bat hi tang namar ba u dei u briew jong u Modi.
U Rahul u la ong “ Haba nga buh jingkylli pat ïa u Modi hapoh Parliament halor ka jingïadei jong u bad u Adani u kiar beit ban jubab da kaba u kylli kylla ïa nga balei nga dei na ka jait Gandhi balei ngam ai Nehru”.
“ Ngi iakren ia kata ka bamsap ha Meghalaya hynrei nga kwah ban iathuh iaphi ka bamsap kaba shyrkhei tam ka dei ha kane ka sorakr MDA bad ka bym pat ju jia kum kane ka jingbamsap ha ka histori jongka ri India” ong u Rahul.
U la ong shuh shuh “ Haba nga kylli ïa u Modi halor ki jingshisha kumno ba u briew u bym pat shemphang ha ka jingpynïaid ïa ki kad liengsuiñ u Adani u ïoh ban pynïaid ïa ki kad liengsuiñ kiba heh kum ha Mumbai bad kiwei kiwei. Une u la ïoh ban pynïaid hadien ba kiba pynïaid mynshwa ki la shah nion palat ha ka CBI bad ED. Udei une uba pynïadei ïa ki kam bar ri bad ka Israel. Ha man ba u Modi u leit jingleit sha bar ri u ju wanrah jingai sngewbha beit ïa u Adani. Ha Sri Lanka lei lei u Modi u ïakren ïa u President ka Sri Lanka ba un ai kam kontrak sha u Adani. Halor kine kiei kiei nga la kylli ïa u Modi kaei ka jingïadei jong u bad u Adani hynrei um treh ban ïathuh. Kine ki jingkren kim ju mih ha ki lad pathai khubor namar la set kak ïa ki da une u heh spah uba ïadei bad u Myntri Rangbah duh”.
“Haba nga kren ha Parliament ym ju ïohi ha ki lad pathai khubor hynrei lada kren u Modi la mih lut ha ki Television ha ki lad pathai khubor katba ki jingkren jong nga kim ju paw ka daw ka long ba la tehlakam ïa ki lad pathai khubor ha kane ka ri da ki ar ne lai ngut ki heh spah kiba ïadei bad u Modi” ong u Rahul .
U la ong mynta ym don lad shuh ban kren ei ei ha ri India bad na kane ka daw la pynlong ïa ka Bharat Jodo Yatra khnang ban ïoh sngew da la ki shkor ïa ka jingud jingnam ki paidbah.
U la ong ba ki don ar tylli ki jingkylli, kawei ka dei ka jingkiew ka jingbym ïoh kam ïoh jam ha ka ri bad kaba long kawei na ki jingeh ha Meghalaya ruh bad kaba ar ka long ka jingkiew dor ki mar ki mata, ka petrol, diesel, gas cylinder bad ter ter. Kine ki dei ki jingeh bad jingjynjar kiba ka ri ka mad mynta namar la bat bad pynïaid ïa ka spah ka phdew tang da ki ar lai ngut ki briew bad mynta ka BJP ka pynjur sa tang ban pynkharoi ïa ki jingïaumsnam bad thombor ha kylleng ka ri. Dei halor kine kiei kiei ba ka Congress kan ïeng ban ïaleh na ka bynta ka lawei jongka ri bad ka Jaidbynriew pynkut u Rahul.