Shillong, Rymphang 22: Ka Khasi Jaintia Church Leaders Forum (KJCLF) hynne ka sngi Balang, kala kyrpad ïa ki paidbah ka jylla ba kin pyndep hok ïala ka kamram ha ka ban jied ïa ki nongmihkhmat daka jingïatiplem kaba shai bad kaba bha bad ban jied ïa ka Sorkar kaba don ka mynsiem ban shakri na ka bynta ka bha ka miat bad ka lawei ka Jylla.
Ha ka kyrwoh khubor, u Secretary ka KJCLF u Rev Dr EH Kharkongor ula pynpaw “Kum ki nongshong shnong ka Jylla, baroh ngi ïa don bynta lang ha ka shalyntem kaba tyllun shisien san-snem ha kaba don ka jingpynrem bad ka jingïaroh, ki jingainia mar kylliang, ki jingthew jingwoh bad ki jingpyrto ban leh kham bha bad kiwei kiwei de. ïa ki mat treikam la tyrwa lyngba ki jingkren, ki drama bad hateng hateng ruh ha ki sur jingrwai ba sngewbang watla kaba kham bun hi ka long ha ki jingsawa kawkaw kiba palat ïa ka bor jong ki briew ha shnong ha thaw ban shahskhor”.
U Rev Kharkongor ula pynpaw ba don ki jingkren ne jingleh kiba ktah bad pynsngewsih ïa ka jingsngew mynsiem jong ki briew shimet, donkam ban buh jingkylli tyngeh bad bishar bha!
“Ki dkhot jong ka Khasi Jaintia Christian Leaders Forum (KJCLF) ki sngew bynniaw shibun eh halor ka jingpyndonkam bakla ïa ka sur jingrwai ba kynja mynsiem “Nga la kut jingmut ban bud i’U Jisu” da uwei u kyrtong bad ka party jong u bad kiwei kiwei de kiba syriem ïa kane. Kane ka jingleh pharshi ba khlem jingpyrkhat ka buh ïa ki jingkylli halor ka jinglong rangbah jingmut bad ka jingdonburom jong une u kyrtong bad ka party jong u, bad dei ki paidbah ki ban rai” la ong u nongïalam ka KJCLF.
Ka Forum ka kyntu ïa baroh kiba don bynta ha kane ka elekshon ban kiar na kiba kum kine ki jingleh ne jingkren, na ki jingshukor bad ban kiar rai-eh rai-dam ïa ki jingïaleh jubor.
“Ka KJCLF ka khot bad pynshlur ïa ki nongshong shnong ba ha ka sngi thep vote ban pyndonkam thikna ïa la ka jong ka hok ban jied nongmihkhmat da ka jingïatiplem kaba shai bad kaba bha. Kane ka long da ka jingsngewthuh bad jingtip ba ki paidbah kin jied ïa ka Sorkar bathymmai ka ban aiti hok sha ka jingshakri bad ka lawei jong ki nongshong shnong ha ka Jylla khlem da don kano kano ka jingleh shilliang lane ka jingñiew-kiar ïa kiwei, bad ban pynskhem ïa ka suk ka saiñ ha ka ri” la pynkut ka kyrwoh na u Secretary ka KJCLF.
