Shillong, Rymphang 22: Hapdeng ka jingjaw ummat, ka jingïam kthang bad ka jingbynnud, ki hajar ngut ki paidbah Sohïong ki la ïeng laiñ ha baroh arliang surok ban pdiang sngewbha ïa ka met u Bah HDR Lyngdoh, uba ki paidbah ki khot ieit beit ïa u, u Maheh.
Ïa ka met u Maheh la pynkit na Shillong sha Sohïong hapdeng ka jingsynran ki Pulit bad ka jingpynshngaiñ lang kiba haïing hasem bad ki nongkyrshan jong u haduh ban da poi ha Sohïong.
Ki paidbah kiba la rah ïa ki lama ka UDP, ki placard kiba don bad ki jingthoh bapher bapher ki la ap lypa naduh shuwa ban rung sha Shnong. Nangta ki la rah da ka banner kaba don bad ka dur jong u Bah Don, ki la ïaid nakhmat ban ïalam nakhmat haduh ban da poi ka met ha ïing.
Lah ban kdew hangne ba u Bah HDR Lyngdoh, u la khlad noh ha ka 20 tarik mynta u bnai por 6 baje eiei janmiet ha Bethany Hospital na kata ka jingpang kaba la ïathuh da ki Doctor ka Bethany Hospital ka Extensive Anteroseptal Myocardial Infraction ne ka jingpang kaba ktah na u Klongsnam.
Ïa ka met jong u yn tep donburom ha ka Sngi Palei ha por 11 baje mynstep ha u lum jingtep ka Balang Presbyterian Sohïong.
Ha shuwa kane kan don ka jingïalang ha ïing jong u, ha kaba yn don lang ki nongïalam jong ka UDP bad kiwei kiwei.
U Bah HDR Lyngdoh u la jop ïa ka elekshon MLA ha u snem 1988 na ka Seng HSPDP. U la bat nyngkong kum u Myntri ka tnad Sports bad kiwei kiwei. Hadien u la rung noh sha ka Congress bad u la long uwei na ki MLA ba rangbah bad Myntri ka sorkar bad bat ruh bun ki tnad ba donkam, kum ka PWD, Home bad kiwei kiwei.
U la long ruh u MDC bad EM ka KHADC. Ha ka snem 2018 u la shah rem noh ha u Bah Samlin Malngiang jong ka HSPDP. Ha ka snem kaba ladep u la pynïasoh noh sha ka UDP bad ka Seng ka la jied ïa u ban long kum u kyrtong na ka bynta kane ka elekshon MLA 2023.
Ha kaba ïadei bad ki ban mih pli ha jaka jong u Maheh ban ïakhun ïa ka elekshon na Sohïong ïa kaba yn sa buh tarik da ka Election Commission, ki paidbah ki kwah ba u Pyrsa trai jong u Maheh, u Bah Synsharlang Lyngdoh un long kum u Kyrtong ka UDP.
