Ka bai bording elektrik ba la pynmih da ka MSERC ka dei kaba biang, ong u AT Mondal

By Mawphor Editor On Dec 9, 2024

Shillong, Nohprah 08: U Myntri ka tnat bording ka jylla u AT Mondal u la ong ba ka khajna jong ka tnat kaba la pynmih dangshen da ka Meghalaya State Electricity Regulatory Commission (MSERC) ka dei kaba biang.
Kane ka jingong jong u ka la wan hadien ba ki la don ki jingdawa na baroh ki liang ba ka Meghalaya Energy Corporation Limited (MeECL) kam dei ban pyntreikam ïa kane ka khajna kaba thymmai kaba la pynmih ruh ha ka 28 tarik u Naitung.
Haba kylli halor kane, na ka liang u Mondal u la ong, “Kane ka dei ka kam kaba ju leh manla ka snem. Bun na ki jylla ki ju leit ban kynduh ïa ka regulatory commission bad kane ka shong ha ki rukom pynlut ba ki thied ïa ka bai bording. Kumba ju long ngi la ïaid katkum ki jingpynbeit jong ka commission ha kaba ïadei bad ki khajna bad nga ngeit ba kane ka jingpynbeit ïa ka khajna ka long kaba biang.”
Ha kaba ïadei bad kane na ka liang u Myntri u la ong ba katkum ka national tariff policy, 2016, ki lah ban kyntiew ne pynhiar ïa ka khajna da 20%. Kumta ka cent per cent ka dei ka khajna kaba lah ban kyntiew sha ka 120% ne 80%. Ha kine ki snem ka la don ka jingkylla na kane kaba ju dei ban long. Kane kadei jingbuh bad ba la pynbeit da ka commission.
Halor ki jingkynnoh ha kaba ïadei bad ki karkhana, u Mondal u la ong, “Phi kren shaphang ki karkhana jong ngi, hynrei ki karkhana kiba bam bha ïa ka bording dei ki karkhana shna nar (ferro alloy), ha kaba 72 sha ka 78% bad kaba la kiew ruh sha ka 80% ka ban long 20% plus/minus factor.”
“Kane kam dei kaba la kylla na ka jingbam bording ki karkhana shna nar ha kaba ka dor la dep ban kyntiew sha ka 80%,” u la bynrap.
Lah ban ong ba na ka liang ka HYC ha ka 21 tarik u Naiwieng, ka la kynnoh ba ka commission ka la pynmih ïa ka hukum ban pynthymmai ïa ka bill naduh u Nohprah 2024 sha baroh ki nongpyndonkam bording, hynrei ïa ka jinglut kaba bun yn lum na ki nong pyndonkam bording kata na ki paidbah.
Halor kane na ka liang ka seng ka la ong ba kane ka jingleh jong ka tnat kadei kaba ym lah ban pdiang.