Shillong, Nohprah 08: Ka District Council Affair (DCA) jong ka sorkar jylla kaba dei ka tnad sorkar ban pynïaid ïa ka elekshon MDC sha ki District Council kiba don ha ka jylla Meghalaya, kata ka KHADC bad ka JHADC ki ban sa pynlong ïa ka elelction ban jied ïa ki nongmih khmat sha kitei ki ïing dorbar kat haduh mynta kam pat ai jingkhein haduh katno ki kyrtong kiba ïa khun ïa ka election ki lah ban pynlut.
Ki thymmei khubor kiba ïajan bad tnad District Council Affair jong ka sorkar jylla la sngewthuh ba ki dang don ha ka jingpyrkhat katno ki kyrtong ki ban ïa khun ïa ka MDC election kin lah ban pynlut ha ka elelshon MDC ka ban long ha u snem 2025.
Ki lad khubor ki pynsngew ba kan don ka jingpynkiew ha ka jingpynlut na ka bynta ki kyrtong ha kane ka MDC ka ban sa long namar ka jingkiew dor ha ïew ha hat, haba ïa nujor hynriew snem mynshuwa bad mynta, hynrei ka tnad District Council Affair ka dang pynkhreh ïa kane ym buh haduh katno ki kyrtong MDC ba kin lah ban pynlut.
Ka jingpynkhreh na ka liang jong ka DCA ban pynlong ïa ka election sha ki ar tylli ki ïing dorbar jong ki District Council ka KHADC bad ka JHADC kala dang ïaid sha khmat bad shen ka tnad DCA kan lah ban pyndep shuwa ban pynbna ïa ka ka tarik jong ka election.
