Ka aïom Advent ka dei ka por ban kylla na ka jinglong barim sha ka jinglong bathymmai: Most. Rev. Ferdinand

Jowai, Nohprah 8: Ka Proseshon Iukharist kaba shisien shisnem jong ka Parish Jowai ka la long hynne ka sngi (08/12/2024) ha madan skul Marian Hill Higher Secondary School, Jowai, ha kaba da ki hajar ngut ki para-bangeit napoh ka Jowai Diocese bad nabar ki la ïawan ban shim bynta ha kane ka proseshon Iukharist ka Parish Jowai.
La sdang ïa kane ka sngi da ka jingkñia Mass Bakhuid ba la lamkhmat da u Bishop jong ka Jylla Niam Jowai u Most. Rev. Ferdinand Dkhar DD ha ryngkat ka jingsynranlang ki Lyngdoh Sohblei. Da ki hajar ngut ki paidriewngeit ki la ïashim bynta ban ïabam ïasip ïa u Kpu u Rynsi uba la pynkyntang uba long ka Met bad ka Snam jong u Trai Jisu Khrist nalor ki khynnah kiba pdiang ïa ka Komunion kaba nyngkong ha ka jingim jong ki.
U Bishop Ferdinand haba ai ïa ka sneng ka kraw sha ki paidriewngeit, u ong ba kane ka dei ka por jong ka aiom Advent kaba dei ban aiom jingpynkhreh ïa ka jingkynmaw ïa ka jingwan longbriew jong u Trai Jisu Khrist u khun ba marwei jong U Blei sha kane ka sla pyrthei ar hajar arphewsaw snem mynshwa bad ka por Advent ka dei ka aiom jong ka jingkylla ym tang kaba shabar bad kaba kongsan eh kaba shapoh ka mynsiem bad ka dohnud bad na ka jinglong ïapait ïapra sha ka jingïasuk ka jingïatylli, na ka mynsiem bishni pihuiñ sha ka mynsiem ka jingïaieid, ka jingsbun bad ka jingïarap markylliang.
U Bishop Ferdinand u ban shuh shuh ba ka aiom Advent ka dei ka aiom jong ka jingkylla kaba mut na ka jinglong barim sha ka jinglong kaba thymmai, kiba don ha ka jingdum ban ap ïa ka sngi ka jingshai, kiba ïapait ïapra kiba ïashun ïapen sha ka jingïasuk khamtam ha ka jingïadei bad U Blei. U la pynkut ïa ka sneng ka kraw da kaba kyntu ïa ki paidriewngeit da kaba ong ban ïoh ïa ka jingsuk donkam ïa ka mynsiem kaba sngewrit kum u Ioannis Baptist “Ma U, U dei ban nangkhraw, nga pat ban nangrit” (John 3:30) na ka mynsiem khwanlalot sha ka mynsiem sngewlem, na ka mynsiem ehdohnud sha ka mynsiem jemnud. Ngi long ki briew jong ka Advent bad kum ki briew jong ka Advent to ngin pynkhreh ïa ka jingwan longbriew jong U Jisu Khrist ha kane ka sngi Khristmas.
Ha ka por shiteng sngi la pynlong sa ïa ka jingïaid proseshon Eucharist na madan skul Marian Hill sha Ïawmusiang, Mission Compound, Iongpiah, Dulong, Tpep Pale bad wan phai biang sha madan Marian Hill. Ka jingïaid proseshon ka long kaba ïaid beit ïaid ryntih ha kaba ki paidriewngeit ki la ïashim bynta shongkun shongblei ha ki jingduwai bad ha ki jingruwai ha baroh shilynter ka jingïaid proseshon.
La pynkut ïa kane ka sngi lyngba ka jingkyrkhu da ka Sacrament Bakhuidtam ka Duwan na kti u Bishop Ferdinand Dkhar, la ïoh ïa ka jingkren kaba sngewtynnat shaphang ka Sacrament Iukharist bad ïa ka jingdon bad ka jingshong rieh jong u Jisu, u Khun u jong u Blei bad uba long hi ruh U Blei hapoh u Kpu uba la pynkyntang da u Phadar Laurence Paswet, Principal ka Marian Hill Higher Secondary School.