Nongpoh, Naiwieng 11: Ki jingangnud bad ki jingphohsniew ki paidbah ka thaiñ Ri Bhoi Sepngi ha Ri Bhoi District kan sa urlong shisha bad kane kan dei ruh ka sngi sah jingkynmaw na ka bynta ki paidbah ba ka 24 tarik u Naiwieng 2002 ka dei ka sngi ka ban kyntiew kyrdan noh ïa ka Patharkhmah Administrative Unit sha ka Civil Sub Division.
Lah ruh ban ong ba kane ka jingdawa kyntiew kyrdan ïa ka Patharkhmah Administrative Unit sha ka Civil Sub Division ka la dei kawei na ka mat jingdawa ki paidbah kaba la neh mynta la bun phew snem bad kam shym la urlong satia, hynrei ha kane ka kynti ka jingangnud bad ka jingkhmih lynti ki paidbah kan sa urlong kaba dei hadien ka jingkular u Myntri Rangbah ka jylla, u Conrad K. Sangma uba la pynbna hi da ladei ban plie paidbah noh ïa ka Civil Sub Division ha Patharkhmah ha ka 24 tarik u Naiwieng 2022.
Kane ka dei ka jingangnud ki paidbah kaba la mih la slem bha bad la don ruh ki kynhun kiba la don bynta naduh ka Ri Bhoi Dorbar bad ka Western Ri Bhoi Dorbar kiba la ju pynsawa ïa kane ka sur bad dawa ban kyntiew kyrdan noh ïa kane ka Patharkhmah Administrative Unit sha ka Civil Sub Division, hynrei ha kane ka kynti ka burom la leit ruh sha u MLA ka Jirang, u Bah Sosthenes Sohtun uba la lah ban pynlieh pyniong ïa kane ka jingdawa kyntiew kyrdan kaba la urlong ha ka por kaba u long kum uta u nongmihkhmat ka Jirang Constituency.
Haba kren halor kane ka bynta, kiba bun ki paidbah ka thaiñ Ri Bhoi Sepngi ki la angnud ban poi noh katei ka sngi ban ioh ban sakhi ïa kane ka jingkyntiew kyrdan na ka Administrative Unit sha ka Civil Sub Division bad ka daw hi ka long ba lada wan ka Civil Sub Division shibun ki kam pynroi kin wan poi sha katei ka thaiñ kaba long ka jingmyntoi ki paidbah nongshong shnong ban wan kata ka jingkylla kumba mynta katei ka dong bad ka thaiñ ka la dang kiew shaphrang ha baroh ki liang.
