Shillong, K’lyngkot, 19: Tang hapoh 12 kynta ba ka Model Code of Conduct ka la treikam ha baroh kawei ka jylla Meghalaya hadien ba ka Election Commission of India (ECI) ka la pynbna ïa ka tarik ban pynlong ïa ka elekshon sha ka Iingdorbar Thawaiñ ka Jylla, ki Deputy Commissioner jong ki district bapher bapher ka jylla ki la pynmih ïa ka jingbthah sha baroh ki seng saiñpyrthei ba kin weng noh mardor ïa ki banner bad ïa ki poster.
Tang hadien ba la pynmih ïa ka hukum ha ka sngi Balang, ki Flying Squad ha West Garo Hills ki la weng lut ïa ki poster bad ïa ki banner jong ki seng saiñpyrthei bapher bapher hapoh ka district.
U Chief Electoral Officer (CEO) ka Jylla u Bah FR Kharkongor, ha ka sngi Balang u la ong ha kaba ïadei bad ka jingwah ïa ki dur ki dar, ki banner, ki lama ha ki nongkynti ka sorkar dei ban weng noh mardor hapoh ka 24 kynta naduh ba la pynbna ïa ka elekshon, bad ha ki jaka paidbah ïa ki jingwah lama, ki banner bad kiwei kiwei yn sa weng noh hapoh 48 kynta, katba ha ki jaka shimet yn hap ban weng noh hapoh 72 kynta.
Ka Election Commision of India dang shen ka la mana ban dro ha ki kynroh, ban wah ïa ki dur, ki jingthoh, ki banner bad kiwei kiwei khlem da ïoh jingbit bad nalor kine ka ECI ka la maham ruh ban pynlong ïa ki jingïalang khlem ka jingmynjur bad ka jingai jingbit jong ki Deputy Commissioner bad ki bor ba dei peit.
Nalor kata, la mana ruh ban rah pisa palat 50 hajar shaneng bad ki ksiar ki ksah khlem ki jingpynshisha bad la bthah ruh ïa kiba buh suloi ba don laisen ba kin leit aiti noh mardor sha ki thanat kiba don hajan tam katba ka Model Code of Conduct ka dang treikam ha ka jylla.
Kiba leh pyrshah ïa ki jingmaham kin ngat ha ki jingshah pynshitom.
