Dei ki nongïalam UDP ba jied ïa u Conrad kum CM, balei mynta ki kynthoh kylla : NPYF

Shillong, K’Lyngkot 19 : Ka National People’s Party lyngba ka Youth wing, ha ka sngi Palei ka la ong ba dei ki nongïalam ba rangbah ka UDP ki la tyrwa bad jied ïa u Conrad K Sangma ban shimti ïa ka shuki Myntri Rangbah hadien ka elekshon MLA ha u 2018, hynrei mynta pat katei kajuh ka party kaba kynthoh kylla.
Haba kren bad ki lad pathai khubor, u President ka National People’s Youth Front (NPYF) Bah Kitborlang Nongrem u la ong, “Shwa ban thaw ïa ka sorkar MDA dei ki nongïalam ka UDP kiba tyrwa ïa kyrteng u Conrad kum u Myntri Rangbah bad dei ma ki hi kiba kyrshan ïa kane ka sorkar haduh mynta, kumta ban shu kynnoh ba ka jingplie ïa ki projek bapher bapher kadei tang ka jingpynbiej elekshon, kadei kaba ngim lah satia ban pdiang.”
Shuh shuh u la ong ruh ba kumba long haduh mynta hi, ka UDP kan dang ïai long hi ka party kaban hap shu snoh wat ha kane ka samoi ban wan ruh.
“Ngi lyngoh balei ka UDP ka shu kynthoh tang ïangi, balei kim ju nud ban kynthoh ïa kiwei pat ki party kum ïa ka TMC bad BJP. Hato kane kadei ba ki tieng namar ki hap ban ïakhun pyrshah ïa ka NPP ha bun ki jaka ha bun ki jaka ha rilum Khasi, klet noh ïa ka rilum Garo, ” u la ong.
Nalorkata, u ong ruh ba ki sngew lyngoh haduh katta katta ban ïohi ba ki nongïalam ka UDP Youth Wing, ha kine baroh san snem ki biang beit bad kim ju pyrshah eiei hynrei mynta kynsan kynsan shwa ka elekshon pat ki mih ban pyrshah ïa ka sorkar ba ïalam da ka NPP.
“Halor ka jingong jong ki ba ka NPP kadei ka party kaba riewspah tam, nga ruh nga buh ka jingkylli kumno ki tip ïa ka jingdon spah kiwei pat ki party, namar ngi, ngim tip katno ka UDP ka don spah,” la bynrap biang utei u nongïalam ki samla NPP.
Shuh shuh u ong ruh ba um sngewïahap satia ïa ka jingïai kynnoh jong ki, ba ki MLA ba ïasoh sha ka NPP ki ïoh haduh 5klur. “Dang hynin ka sngi ruh ngi ïohi ba san ngut ki MLA ki rung sha ka UDP, lada ki ngeit ba ki MLA ba rung sha ka NPP ki ïoh san klur, kumta ngi ruh lah ban ong ba kiba rung sha ka UDP ki ïoh 10 haduh 20 klur tyngka. Kumta, ki paidbah kim dei ban biej ïa ka jingkynnoh khlem da don ki jingpynshisha,” u la ong.
Haba ïadei pat bad ka jingïakhih bad ka jingdawa ki nonghikai, u Bah Nongrem u la ong ba ka UDP kadei ban tip ba ïa ka tnad pule puthi la bat hi da u MLA jong ka party jong ki hi, u Bah Lahkmen Rymbui hynrei ha kaba khatduh dei u Symbud Myntri Rangbah ka jylla uba la shimkhia ban pynbeit ïa ka jingeh jong kitei ki nonghikai.