Shillong, K’Lyngkot 19 : Ka kynhun ki samla na Mawkynrew ki la buh jingkylli ïa u MLA ka thaiñ, Bah Banteidor Lyngdoh da kaba ong ba haduh mynta kim pat ïohi satia ïa ki dak ki shin ba yn kyntiew kyrdan noh ïa ka PHC Jongksha sha ka CHC bad ruh ïa ka Sub Centre kaba don ha Thynroit sha ka PHC kumba la dep ban plie ïa u mawnongrim.
Kitei ki samla hapoh ka jingïalam jong u samla Emerald Shabong haba kren bad ki lad pathai khubor ki la ïathuh ba nyngkong ki la pyrshang ban phone ïa u MLA ban wad jingtip haba ïadei bad ka jingkyntiew kyrdan ïa kitei ki jaka sumar.
“Hynrei la pyntip ïangi ba u don sha Delhi hynrei wat hadien ba u la wanphai ruh u khlem ong ei ei shuh,” u la ïathuh da kaba bynrap bad dei na katei ka daw ba ki leit ban wad noh da ka RTI khamtam haba ki lap ba ym pat paw kam wat tang shi mohkhiew ruh wat hadien ba la dep ban plie mawnongrim.
U la ïathuh ruh ba dei hadien ba ki ïoh pdiang ïa ka jubab ha ka 04tarik mynta u bnai, ba ki shem ba kam pat don satia ka jingmang pisa na ka bynta katei ka jingkyntiew kyrdan ïa kitei ki jaka sumar.
“Ngi dap da ka jingsngewsih bad ka jingbitar namar ngi la shaniah bad ngi ieit ïa u kum u nongmihkhmat lajong hynrei ngi shah thok,” u la ong.
Katkum ka jingong jong u, ka jubab ba ki ïoh na ka RTI ka kdew ba ka jingpynkhreh na ka bynta ka jingkyntiew ïa ka Jongksha PHC ka dang ïaid ha ka jingmang pisa kaba 12.12 klur tyngka.
“Hynrei la ong ba ïa ka kam yn sa sdang tad haduh ba la mang pisa na ka bynta katei ka skim,” u la ong. Ha kajuh ka por u la ong ruh ba na ka bynta ban kyntiew kyrdan ïa ka Thynroit Sub Centre ruh la kdew kumjuh ba ïa ka kam yn lah ban sdang tad ba ki la ïoh ïa ka jingmang pisa.
Shwa kane, kitei ki samla ki la pynpaw ba lada ki don ïa ki jaka sumar kiba biang, kan long ka jingkyrkhu kaba khraw ïa ki nongshong shnong ka thain khamtam kito kiba sah ha ki shnong ba kham kyndong ban ïoh ïa ka jingsumar kaba biang khlem da donkam shuh ban leit sha Shillong haba ki shitom jur.
