Shillong, K’lyngkot 19: Ka Khasi Hills Autonomous District Council (KHADC) ha ka sngi Palei ka la pynbna ïar sha ka Hima Mylliem baroh kawei ba ka jingïajied ïa u Syiem bapura kan sa long ha ka 20 tarik, Rymphang, 2023 ha ka por 12 baje shiteng sngi ha Conference Hall jong ka KHADC, Shillong.
Katkum ka jingai jingtip jong u Returning Officer ka KHADC, san ngut ki kyrtong kiba la thep kyrteng ban ïakhun ki long u Samran Sing Syiem, u Pynshailang Syiem, u Banteilang Syiem, u Ainam M. Syiem bad u Mansan Manik Syiem.
La pyntip ba ka jingïajied syiem kan long da kaba shu ñiew khlieh ïa ki nongjied ba la ithuh/mynjur katkum ka Khasi Hills Autonomous District (Appointment and Succession of Syiem, Deputy Syiem, Electors and Rangbah Shnong of Mylliem Syiemship) Act, 2007 kumba ladep pynbna ha ka 11 tarik, Kyllalyngkot, 2023.
La bthah ruh ba ki nongjied ki dei ban wanrah ïa ki jingpynshisha ïalade kum ka EPIC Card/Appointment Order (Sanad) jong ki ha katei ka sngi.
