Nongstoiñ, Nailar 06: Ka tuh ka thiem ka la nang kynrei kylleng ki jaka bad baroh shikatta ka jingtuh ka jur eh kum ka jingprong dukan ha ki por mynmiet, prong ïa ki ïing briew ha ki por mynsngi bym don briew, ka jingtuh ïa ki tiar kali, ki tape kali na ki kali bad kumta ter ter. Hynrei, mynta ka la jyllei sa ka jingshah tuh ki jingri jingdup kum ki masi, ki blang, ki syiar bad kiwei kiwei ki jingri kaba la jia ha ka thaiñ Nongstoiñ.
Kane ka jingjia ka la jyllei bha ha kine ki sngi ha ki jaka kyndong kiba don ha ka West Khasi Hill sDistrict hi baroh kawei. Katba nang tyllun ki por, kine ki jingjia shah tuh ki la nang jur bad jyllei man la ka sngi.
Dang ha ka 6 tarik u Nailar 2026, ki nongshong shnong ka shnong Nongdisong kawei na ki shnong ha ka thaiñ Nongstoiñ West Khasi Hills District, ki la ud la nam namar ka jingshah tuh ïa ki blang jong ki kiba la kot haduh 28 tylli ei ei. La suba ba katei ka jingshah tuh ka lah ban dei kaba la jia mynstep shiteng synñia ha ka por antad kumba 1 baje ei ei.
Na ka liang u bah Gilbertson Peiñlang u ba dei u trai blang na ka shnong Nongdisong, ha ka jingïakren bad u nongthoh khubor u la ong ba ki blang kiba la shah tuh, ki dei jong ka Ebelinda Peiñlang, Selvina Peiñlang kiba dei ki kmie jong u bad uwei pat u dei u ba la tip kyrteng kum u Corniluis Lyngkhoi.
U la ong ba katei ka jingjia shah tuh jong ki ka jia lang ha kajuh ka por, namar kitei ki lai ïing ki don marjan ïing bad ki blang ruh ki la jah na baroh ki lai tylli ki sem. Hynrei kim shym la ïoh sngew kano kano ka jingsngew ne pah ei ei bad ha ka por 1 baje ei ei shiteng synñia u bah Gilbert u la ïoh sngew ba ka la don ka jingwiar ki ksew. Tangba um shym la poi pyrkhat ba kin sa dei ki nongtuh, kumta la shu antad ba ka lah ban dei ha kita ki por ba wiar ksew.
Na ka liang jong u bah Gilbert u la kyntu ïa ki paidbah ba lada don kino kino kiba ïohi ïa ki kali ne kino kino kiba ishan khmat, kin sngewbha ban bat bad ban tohkit bniah ïoh dei ki blang jong ki. U la ong ruh ba lada don kino kino kiba ïoh kem kin sngewbha ban pyntip sha ki da kaba shu phone ha u 6009793451.
