Angnud ki nongrep ba ka sorkar kan ithuh noh ïa u sohphlang kum u mar rep ba kongsan

Mairang, Nailar 06: Ka shnong Mawkohngei kadei kawei na ki shnong kiba itynnad bha kaba don harud ka surok Nongshilong – Jakrem kaba hap ha ka Mawthadraishan C & RD Block Eastern West Khasi Hlls district.
Ki nongshong shnong ha katei ka jaka ki im da ka rep ka riang bad ki dei kiba pariah parai, kiba palei jingmut , kiba smat ba sting bad ki bym ju pynsep ei ïa ka por jong ki hynrei ki pynlut ïa ka por ha ka rep ka riang , ki shah ïa ka jingshit ka sngi, u slap bnad ka lyer bad ki minot thop ha la ki kam ki duk .
Ha kane ka sngi palei u nongthohkhubor jong u Mawphor u la hiar sha katei ka shnong ban ïakynduh ïa ki nongrep bad ban twadjignmut ha kaba ïadei bad ka rep ka riang .
Ha katei ka sngi la ïoh ban ïakren bad ki nongrep soh phlang ha kaba ki la pynpaw ïa ka jingsngew khia namar haduh kine ki sngi na ka liang ka sorkar kam pat lah ban ai kano kano ka jingïarap kaba lkyrpang na kabynta u soh phlang.
Nalor kata ki la pynpaw ruh ïa ka jingsngewkhia namar u soh phlang u dei u mar rep uba kongsan tam jong ki paitbah jong ki phew tylli ki shnong kiba don ha katei ka thaiñ.
Shuh shuh ki la ong ba ki don ki snem ba u sohphlang u ïap stem hynrei kim ju ïoh ïa ki dawai na ki ophis sorkar na kabynta ban ïada na katei ka jingïap stem. Kitei ki nongrep sohphlang ki la ïathuh ruh ba don ki snem kiba ka jingïap stem ka duna don pat ki snem ba ka jur bha.
Ha kaba ïadei bad ka kam rep sohphlang kitei ki longkmie ki loa pynpaw ba ki kwah bad angnud ba ka sorkar kan thaw ki lad ki lynti na ka bynta ban ai ki jingïarap ba kyrpang ïa mki nongrep soh phlang la ka dei da kaba pynïoh ïa ki kynja dawai ban ïada na ka jingïap stem kaba dei ban long da ka subsidy kum ba long ïa kiwei ki mar rep.
Nalor kata ki la kyntu ruh ïa ka sorkar ba kan shim khia nmar lajan man la u snem ki ju don ki tamasa soh phlang ha kaba la pynpoi ïa u soh phlang da ki nongrep na kylleng ki jaka kumta na ka bynta ban kyntuiew shuh shuh ïa ka kam rep sohphlang kid a angnud ba ka sorkar kan phaikhmat kyrpang sha ki khang ba kin lah ban kyntiew shuh shuh ïa ka ïoh ka kot, ka kmai kajih bad ban kyrshan ïa ki long ïng longsem.
Ka long ruh kaba sngewtynnad ba ha ka pyrthei baroh kawei ym don ba tip bad ym lah ban ïoh ruh ïa u soh phlang hynrei dei tang hangne ha ka jylla Meghlaya ba lah ban ïoh ïa u.
Kumta na ka liang ka sorkar ka la dei ban ithuh kyrpang bad ka la dei ban thaw ki lad ki lynti na ka bynta ki nongrep soh phlang ba kin pynpoi haduh shabar ka jylla bad kiwei ki bynta jong ka pyrthei.