Shillong, Risaw, 09: U Myntri Rangbah ka Jylla u Conrad K. Sangma, ha ka sngi Balang u la bteng ban leit jngoh ïa ki jaka ba la shah ktah ha ka jingshlei um ha rilum Garo.
Nyngkong eh u Myntri Rangbah u la leit jngoh ïa ka Chokpot Civil Sub Division ha South Garo Hills bad ïa ka Reni Badimagre, ha kaba kawei ka jingkieng doidoi ha wah Dareng kaba pynïasoh ïa ka Reni Badimagre sha Bibragre ka la khyllem na ka jingshlei jong um. Hynrei ki paidbah ha ka shnong Reni Badimagre kim shym la shah ktah satia na ka jingshlei um.
Ka Mt Carmel School kaba don hajan ka iew Chokpot ka la shah ktah ha ka jingshlei um watla ka ingskul kam shym la shah pynjulor hynrei ki kot ki sla, ki tiar ki tar hapoh kane ka skul ki la julor.
Hadien kane, u Myntri Rangbah u la leit jngoh sa ïa ki ing ba la shah pynjulor ha ka shnong Bibragre, Chokpot. Ki don haduh 20 tylli ki longing kiba la shah ktah na ka jingshlei um bad 9 tylli ki la shah pynjulor. Ïa ki marbam mardih la sam ruh ïa ki 20 tylli ki longïing kiba la shah ktah na ka jingshlei um.
Ha ka shnong Rongrakgre u Conrad u la ïakynduh markhmat bad ki longïing kiba la shah ktah na ka jingshlei um. Ki don haduh 38 tylli ki longïing ba la shah ktah bad 24 tylli ki iing la ïoh jingtip ba ki la shah pynjulor. Ïa ki marbam la sam ruh sha ki longing ha kane kajuh ka sngi.
Hadien kane, u Conrad u la hiar sa sha ka shnong Gonganggre bad Danggilgre ban leit ïakynduh markhmat bad ki lanot. Ha kine ki ar tylli ki shnong ki don 27 tylli ki longïing kiba la shah ktah katba 10 tylli ki ïing kiba la shah pynjulor. Ïa kine ruh la ai jingïarap da ki marbam.
U Myntri Rangbah u la leit jngoh ruh ïa ki iing ba la shah pynjulor ha ka shnong Daramgre. Ha kane ka shnong ki don 7 tylli ki longïing kiba la shah ktah bad lai tylli kiba la shah pynjulor. Nangne pat u Myntri Rangbah u la leit jngoh ïa ka madan Daramgre kaba la shah tap ha ka khyndew na ka daw ka jingshlei um. U Myntri Rangbah u la kular ban sa phah pynkhud ïa ka khyndew da ka jingïarap jong ka tnat PWD.
U Conrad u la leit jngoh ruh ïa ki lanot ha ka shnong Rongrikkimgre bad leit jngoh ruh ïa ka jingkieng doidoi ha Wah Dareng kaba la shah rong ha ka umsaw kaba pynïasoh ïa ka shnong Rongrikkimgre sha ka shnong Dikronggre. Ïa kane ka jingkieng doidoi la shna da ka ophis Border Areas Development Office (BADO) la bun bun snem.
