Nongstoiñ, Jymmang, 18: Myntri Khynnah jong ka Sorkar Pdeng ba dei khmih ïa ki tnat Chemicals bad Fertilizers and New & Renewable Energy, u Bhagwanth Khuba, mynta ka sngi palei u la hiar sha Nongstoiñ, West Khasi Hills District ban peit ïa ka jingpyntreikam jong ki skhim Sorkar pdeng ha ka jylla.
U Myntri u la peit ïa ka jingpyntreikam ïa ki skhim bad u la ïakynduh ïa ki nongmihkhmat jong baroh ki tnat bad ki bor distrik. Ha ka jingjurip jong u, u la ong ba u la hun ïa ka jingpyntreikam jong ki skhim bapher bapher. U la ong ruh ki don katto katne ki jingbym treikam bha bad ba la dep ïakren ban pynbeit ïa ki jingeh.
U la kren shaphang ki skhim solar PM KUSUM bad u la ïathuh ba ki don shuh shuh ki subsidy na ka bynta ki jylla ka thaiñ shatei lam mihngi. “Ka skhim KUSUM rooftop ka dei kaba don ha baroh kawei ka ri. Ngi la ai subsidy shuh shuh ha kine ki jylla ka thaiñ shatei lam mihngi. Baroh ki skhim kiba ïadei bad ka thaiñ shatei lam mihngi ki dei kiba ngi peit thuh bha, ki don shuh shuh ki subsidy ki ban ai jingmyntoi ïa ki briew”, u la ong.
U la kyntu ïa ki bor distrik ba kin shim shuh shuh ïa ki jingmyntoi na ki skhim MNRE. U la pynlong ruh ïa ka jingïalang bad ki briew bad ki rangbah shnong na Nongstoiñ, kiba la batai ïa u shaphang ki jingeh bapher bapher. U Khuba u la ong ba yn shim lut ïa ki sien jam ban pynbeit ïa kine ki jingeh.
Ha ka jingïakren bad ki lad pathai khubor, u Myntri u la ban biang shaphang ka jingpeit bniah ka Sorkar pdeng ban kyntiew ïa ka thaiñ shatei lam mihngi ha ki kam bapher bapher. Ka jingkyntiew ïa ki jingdon jingem kum ki surok bah, ka jingpynpoi surok sha ki shnong, ka jingpynïoh ïa ka um kaba khuid lyngba ki kor bad kiwei kiwei.
“Mynta hadien 9 snem, ka thaiñ shatei lam mihngi ka la ïa ryngkat kyrdan bad kiwei kiwei ki jylla jong ka ri”, u la ong bad bynrap ba ka Sorkar ka la pynthikna ba ki Myntri Sorkar Pdeng ki wan jngoh ïa ki jylla ka thaiñ shatei lam mihngi man ka ar taiew ban pynthikna ïa ka jingpyntreikam kham sted jong ki prokram ka Sorkar Pdeng.
Hadien ka jingïalang, u Myntri u la leit ruh sha Mawkawah Anganwadi Centre, Sibsingh Memorial Govt School Nong-pyndeng bad Mawlieh Sub-centre. U la ïakren ruh bad kito kiba ïoh jingmyntoi na ki skhim Sorkar Pdeng, kiba kynthup ruh ïa ka PM AWAS Yojana bad u la shem ba ka la don ka jing-pyntreikam bha ïa ki skhim. U la kyntu ïa ki bor distrik ba kin pynthikna ba baroh kiba dei ban ïoh jingmyntoi ki ïoh ïa kane.
