Hikai ka SWKHDRC&MA ïa ki khynnah ha ka ‘Rock Climbing Bouldering’ ha KMATC&ET
Pynkhreh ban ïashim bynta ha ka Meghalaya Games ban sa long ha Tura
Mawkyrwat, Jymmang, 18: Kum shibynta ban jied ïa ki khynnah ki ban leit ïa shimbynta ha ka Rock Climbing & Mountaineering ka ban sa long mynta u snem ha Tura, ka South West Khasi Hills District Rock Climbing & Mountai-neering Association (SWKHDRC&MA) ka la ïoh ban pynlong ïa ka jingai jinghikai kaba ki khot ka ‘Rock Climbing Bouldering’ ha Kynrew Myllah Adven-ture Training Centre and Eco-Tourism (KMA-TC&ET) kaba don ha Mawranglang, South west Khasi Hills District.
Kane ka jingai jinghikai ka long na ka bynta ban hikai ba khambniah ïa ki khynnah kumno ban kiew ïa ki Maw bad kumjuh ruh ïa ki buit ba ki dei ban leh khnang ba kin lait na ki jingmynsaw namar ka jingkiew ïa ki maw ka long kaba eh bha lada ym don ki jinghikai ba paka ne ba thikna.
Ha ka khyrwoh khubor ba la phah da u bah Pilestar Nongsiej, President ka South West Khasi Hills District Rock Climbing & Mountaineering Asso-ciation u la ïathuh ba ka jingsdang ban ai jinghikai ïa ki khynnah ka dei na ka bynta ki khynnah ba hapoh ka 15 snem bad kumjuh ruh ban ïoh ban jied ïa ki khynnah ba kin leit ïashimbynta ha ka lympung ïa kop ka ban sa pynïa-lehkai ha ka Meghalaya Game ha Tura ha une u snem 2023.
Namarkata, na ka liang jong ka Association lyngba u President ka khot kawer biang ïa ki khynnah kiba dang don jingthmu ban wan ha ka jingshah hikai ba kin mih shakhmat ban ïa kynduh ïa ki nongkitkam jong ka South West Khasi Hills District Rock Climbing & Mountaineering Asso-ciation (SWKHD-RC&MA) ha kaba kin sa jied ïa ki khynnah kiba la tbit ban ïoh ban mihkhmat na ka distrik ha katei ka Meghalaya Game.
Ha kajuh ka por ka Association ka kitbok na ka bynta ki khynnah ba kin ïalehkai bha ha kine ki sngi ba don kum ka klas ban shah hikai da kaba kin pyn-i ïa kita ki sap ki jong ki bad kyrmen ruh ban kin ïoh ïa ka jingjop ki khnang ba kin ïoh ban wanrah ïa ka nam ym tang ïa ka association hynrei ïa ka thaiñn hi baroh kawei.
Ka Association naduh u President bad ki para dkhot jong ka kin hap ban nang ai ka jinghikai shuh shuh ïa ki khynnah jong ki ha shwa ba ki khynnah kin leit ban ïashim bynta ïa ka Meghalaya Game ka ban sa long shen ha Tura.