Plie maw nongrim u bah Kyrmen Shylla ha ki ar tylli ki surok ha Byndihati bad ha Suchen Dhana

Khliehriat, Jymmang 18 : U myntri ka sorkar jylla, uba dei ruh u MLA jong ka Khliehriat Constituency, u bah Kyrmen Shylla, mynta ka sngi u la plie paidbah ïa ki ar tylli ki mawnongrim ban shna ïa ki surok hapoh shnong Byndihati bad ha shnong Suchen Dhana, la ïa don ryngkat lang ruh u Deputy Commissioner ka East Jaiñtia Hills District, u Abhilash Banarwal, IAS, u Block Development Officer, Khliehriat, u Dr T.Shylla, u DMP jong ka tnat Basin, u bah Hunlang Blah lem bad ki nongpyniaid shnong, ki nongïalam bad ki dkhot jong ki VEC lem bad ki riew rangbah jong kitei ki ar shnong.
Kitei ki surok ki dei na ka skim MGNREGA, na ka District Mineral Funding bad na ka tnat Meghalaya Basin Development Agency (MBDA).
Ka mang tyngka na ka bynta ka surok kaba 1200 mitar ka jingjngai, ha shnong Suchen Dhaka, ka long T48,80,000 tyngka bad na ka bynta ka surok kaba 1300 mitar ka jingjngai ha shnong Byndihatai ka long T.49,95,000 tyngka bad ka jingpyntrei ïa kitei ki surok kan sa sdang noh shen.
Haba kren kum u kongsan ha Byndihati bad ha Suchen Dhana, u bah Kyrmen Syhylla, u la pynpaw ka jingsngew kmen ba mynta la lah ban plie ïa kine ki maw nongrim bad sdang noh ban shna ïa ki surok hapoh shnong ki ban ïarap shikatdei eh ïa ki paidbah nong shnong shnong, ha ka leit ka wan, ka kit ka bah, u la ong ruh ba ha ka jingshisha ïa kine ki surok la dei ban plie naduh ki bnai ba la leit, hynrei na ka daw ba ka don ka kyndon Model Code of Conduct ha kito ki por election na kata ka daw la pynslem bad mynta la ioh pat ban plie ïa kine ki maw nongrim bad ka jingpyntrei kan sa sdang noh shen.
Kum u nongmihkhmat jong ka thaiñ, u la ai ruh ka jingkhublei kitbok kitrwiang ïa ki paidbah nongshnong shnong bad ïa ki bor pynïaid shnong jong ka shnong Byndihati bad ka shnong Suchen Dhana kiba la ai ka jingïatreilang ha ki kam ban kyntiew ïa ka shnong ka thaw, u la ai khublei ruh ïa u Deputy Commissioner uba ju ai ka jingïalang man ka por ban wanrah ïa ka roi ka kiew, ka bha ka miat ha ki shnong ki thaw hapoh ka district hi baroh kawei.
Ki bor synshar shnong jong ka shnong Suchen Dhana, lem bad ki paidbah nongshnong shnong, ki la pynpaw ka jingsngew kmen ïa kane ka jingioh surok rong hapoh shnong, namar kane ka shnong kam pat don surok rong hapoh shnong, ki la ai ka jingkhublei ïa u nongmihkhmat, u MLA ka thaiñ, u bah Kyrmen Shylla bad kumjuh ruh ïa u Deputy Commis sioner ba ki la leh shitom ban pynioh ïa kane ka surok, ka jingioh ïa kane ka surok, kan long ka jingmyntoi shibun ïa ki paidbah bad kan ïarap shibun ha ka leit ka wan, ha ka kit ka bah bad khamtam eh ha ka pang ka shitom bad ha ka por lyiur ba slap bad la ong ruh ba la bun-bun snem ki nongshnong shnong ki khmihlynti ba kin ioh noh da ka surok siang rong hapoh shnong bad mynta ki la ïoh ïa kane ka surok kaba 1200 mitar.