Nongstoiñ, Jymmang, 18: Ha ka 17 tarik u Jymmang 2023, ka kynhun jong ki nongrep kiba na ka thaiñ Mawshynrut ki la leit ban ïakynduh ïa u bah Garod LSN Dykes u khlieh duh ka West Khasi Hills District ban aiti ïa ka jingthoh dawa SDO ba pura na ka bynta ka Mawshynrut Civil Sub Division.
Ha katei ka sngi la ïadonlang u bah Pascal Dkhar President ka Hill Farmer’s Union Mawchynrut Block Unit bad la synran lang ryngkat u bah Zacheus Tympuiñ President Hill Farmer’s Union West Khasi Hills District Unit, u bah Dabul Sing Thabah President Hill Farmer’s Union Sohïong pyllun bad kiwei kiwei ki dkhot jong ka seng.
Ha ka jingïakren bad u nongthoh khubor ka Shlem, ka kynhun ka la ong ba ka jingplie ïa ka Civil Sub Division ka la kynjoh sha ki 6 snem kynthih. Hynrei, kat haduh mynta mynne katei ka ophis kam shym pat la lah ban pyntyllun bha ïa ka rukom treikam ha kiba bun ki bynta. Ka daw ka dei namar ka jingbym pat don u SDO ba pura, hynrei la shu khmih lang tang da uwei u ophisar ba shu peit kum u incharge.
Na ka liang jong ka seng Hill Farmer Union ha ka jingthoh ha utei u ophisar u ba dei u khlieh duh ka district, ka la ong ruh ba ka jingdon jong u SDO ba pura kan pynsuk ïa ki paidbah ban pyndep ïa ki kam kiba dang sahteng. Namar ki paidbah jong ka thaiñ haba ki leit ban wad ïa u SDO kim ju lap ha ophis bad ki la hap ban pynsep ei ïa ka por bad ka bai kali, haba ki hap ban wan na ki shnong kiba jngai bad na nongkyndong.
