Nongpoh, Nailur, 06: U Dr Ricky AJ Syngkon MP ka Lok Sabha mynta ka sngi u la tur khlaw ban kiew sha u lum ba don ka tyllong umdih jong ka shnong Umroi Madan ha Ri-Bhoi, hadien ba naka liang ka NHIDCL, ka ophis u DC lem bad ka shnong kila pynlong ka jingjurip ïaka tyllong umdih ha katei ka shnong hadien ka jingpyrshah jong ki paidbah ïaka jingïaid lynti jong ka surok 4 lane ka ban sa shna naduh Lad Umroi sha Malidor ka ban ïaid lyngba katei ka shnong.
Naka liang u MP u la shimkhia ban leit lang sha katei ka jaka namar ka jingsngewkhia halor ka jingud ki paidbah ha kaba ïadei bad ka jingsyier jong ka jingshah ktah ka tyllong umdih jong ka shnong naka jingwan jong katei ka surok bad ka jingma kaba ap ïaki iing ba sharum lada tih ïa utei u lum ban shna surok.
Naka liang u MP u la kren shai ba ka NHIDCL kaba dei ka kompani ba pyntrei ïa katei ka kam ba kan da bishar bniah shuwa ban pynïaid bad tih surok namar ka kam pynroi kam dei ban ktah ïaki paidbah namar la ïohi ha kiba bun na ki jaka naka jingwan surok bun ki paidbah ki shah ktah, hynrei kadei ka kamram jong u kum u MP ban leit peit bad khmih ïaka jingeh ki paidbah ha katei ka thaiñ dei namarkata ka daw ba u la leit ban synran lang bad ki ophisar ban ïohi ïaka jinglong jingman ha katei ka jaka.
