Shillong, Rymphang, 07: U MLA jong ka Pynthorumkhrah Constituency Bah Alexander L. Hek uba long ruh u Myntri ka Sorkar Jylla ha ka 2 tarik mynta u bnai u la leit jurip ïa ka shnong Pynthorbah na ka ban ban pynbna ïa ki surok, ki lynti ki syngkien bad ïa ki lynti ïaid kjat.
Ïa u MLA, la synran lang da u Executive Engineer ka tnat PWD (Roads) Shillong Central Division, Shillong u Bah Jowel Marbaninag, ka Asst. Executive Engineer Kong Anumanda Sumer, u Joint Engineer Bah Don Swer, u Rangbah Shnong ka Pynthorbah Bah Syrpai Marbaniang bad ki nongkitkam jong ka shnong Pynthorbah
U Bah AL Hek u la Kular ban wanrah ïa ki kam pynroi na ka bynta ban pynbha bad ban pynitynnat ïa ka shnong Pynthorbah khnang ba kan long ka jingkyrkhu ïa ki paidbah jong ka shnong Pynthorbah.
Nalor ki kam ba ladep ban pyntrei, ba kynthup ïa ki surok, ki lynti ki syngkien, ki nala bad ki lynti ïaid kjat ki don ruh shibun ki kam kiba u Bah AL Hek ha ka jinglong nongmihkhmat u la wanrah hapoh ki shnong bapher bapher jong ka Pynthorumkhrah Constituency.
U Bah Hek u la kyrpad ruh ïa ki paidbah ba kin long kiba ïaishah hapdeng ka jingpyntrei bad ka jingpynbha ïa ki surok bad ki lynti ki syngkien hapoh ka shnong namarba kin don ki jingwit ha ka leit ka wan bad ka ïaid ka ieng jong ki paidbah bad ïa ki kali.
