Shillong, Rymphang 07 : U Myntri Rangbah ka Jylla Conrad K Sangma, ula ai ka jingïaroh ïa ka Deputy Commissioner ka East Khasi Hills Kong RM Kurbah halor ka jingnoh synniang ïa la ka jong ka jaka ban ïarap weng ïa ka jingkhapngiah ka Nongbah Shillong.
Haba pynpaw ïa kane ha ka jingkren hapoh ka jingïalang ban buh mawnongrim ïa ka Wah Umkhrah Riverfront Development Project mynta ka sngi Balang, u Conrad ula ong ba ka DC ka EKH kala ïalam lynti da kane ka nuksa bad kyrmen ba kiwei ruh kin ïa bud lang.
“La ïathuh ïa nga ba I Kong (Kurbah) i la ai sngewbha ïa ka jaka shimet ban ïarap weng ïa ka jingkhapngiah ha Nongbah” ula ong.
“Kam dei ka kam kaba rit hynrei nga sngew ba kum ka Deputy Commissioner kala ïalam lynti da ka nuksa. Nga ai khublei shisha ïa ka halor kane ka nuksa ba ka la buh hakhmat ki nongshong shnong bad kumba nga ong, khlem ka jingïatreilang ki paidbah, ngim ym lah ban pyntyllun shakhmat ïa kiei kiei baroh” ong u Conrad.
