Nongpoh, Lber 11: Tang hadien ba ka seng Khasi Student Union, Nongpoh Circle dang shen kala leit ban pynlong ka jingjurip ïaka jaka die kot ha Iew Nongpoh hadien shibun ki jingujor naka liang ki kmie ki kpa ha kaba naka liang ka seng kala leit ruh ban aiti da ka jingthoh sha u DC ka Ri-Bhoi namar ka jingeh jong kiba bun ki longiing ba duk ba rangli, naka liang ka bor pynïaid district ki la shim khia ïa kane ka jing ujor hakaba mynta ka sngi naka liang ki bor Pulit ki la leit ban jurip bad tohkit na ki nongthied bad naki trai dukan kiba shong die kot skul ha ïew-Mawlong.
Ha kane ka sngi, naka liang ki pulit ki la ioh ban tohkit naki katto katne ngut ki nongdie kot lem bad ki nongthied kot hakaba ki la lap ba ka don shisha ka jingdie tam ïaki kot skul palat 5 lane 10 tyngka naka dor trai (MRP) ba la shon haka kot.
Na ka liang katto katne ngut ki nongdie kot ki la pynsngew ba kam shym la don ka jingdie palat pud ïaka dor kot skul naka MRP, hynrei ka jingdie tam ïaki kot haka dor 5 lane 10 tyngka ka dei beit tang ban pynmih ïaka bai kit bai bah ïaki mar kiba hap ban pynpoi naduh Shillong haduh Ïew-Mawlong, Nongpoh.
Ha kane ka sngi naka liang ki bor pulit ki la dep ban shim lut iaki kyrteng jong ki die kot bad kin phah pat ïaka kaiphod sha u Deputy Commissioner ka Ri-Bhoi ban leh ïa kaba donkam.
