Jur ka dheng kali ha Umïam, ai jingmut u MLA ban pynïaid kali na jingkieng nar barim

Shillong, K’lyngkot, 08: U MLA jong ka Voice of the Peoples Party (VPP) na North Shillong Constituency Bah Adelbert Nongrum ha ka Lah Sngi u Blei u la ai jingmut ïa ka Sorkar Jylla ba kan phah jurip ïa ki Engineer bad ïa ki Expert ïa ka jingkieng nar kaba rim kaba don markhap bad ka jingkieng Umïam ban bishar bniah la ka dang long neem kaba lah ban phah ïaid tang ïa ki kali lyngba kane ka jingkieng nar.
Da lade hi u Bah Adelbert Nongrum u la hiar jurip ïa kane ka jingkieng nar kaba rim hadien ba ki paidbah ki la ud bad pynpaw ïa ka jingsuhsat kaba khraw namarba ka jingdheng kali naduh Mawiongrim shaduh Umïam ban jam sha shiliang jong ka jingkieng ka la shimpor haduh 2 kynta.
“Kum u MLA ngan sa phah da ka jingthoh sha u Symbud Myntri Rangbah ka Jylla Bah Prestone Tynsong uba peit ïa ka tnat PWD (Roads) bad ïa u Myntri ka tnat Bording Abu Taher Mondal kum ka jingai jingmut sha ka Sorkar,” la ong u Bah Adelbert.
“Nga ai burom ïa u MLA barim jong ka Umroi Constituency bad ïa u President ka VPP Bah Ardent Basaïawmoit kiba la rah ïa ka mat hapoh ka Iingdorbar Thawaiñ ka Jylla halor ka jingbym shngaiñ shuh jong ka jingkieng Umïam kaba la dei ban maramot naduh mynno,” u la ong.
“Kaba sngewsih ka long ba ka Sorkar kam dei ban ap nalor ba ka jingim jong ka Umïam ka la kut. Mynta ka dang dei tang ka jingjulor kaba rit bad lada ka bthei mano ban kitkhlieh,” u la bynrap.
“Ka jingwan jurip jong nga ha kane ka jaka bad kum u Politician ngam lah ban ong ba baroh ka lah ban long hynrei ka Sorkar ka don la ki jong ki Expert bad kan leh la ka jong ka kamram,” la kyntu Bah Adelbert.
Kane ka jingdheng kali ha Umïam ka la jia naduh ka 13 tarik Nohprah, 2023 hadien ba ka ITC Cementation India Ltd. ka la maramot ïa ka jingkieng Umïam bad buh thong ban pyndep ïa ka jingmaramot hapoh saw bnai eiei. La sakhi ba ki bor Pulit ki la bunkam ban pynbeit ïa ki kali ba leit ba wan. Hynrei wat hapdeng ka jingmana ban ym ïa knieh ïaid ynda poi ha ka jingkieng Umïam, hynrei kiba bun na ki nongñiah kali kim shym la kheiñ snep ïa ka jingkyrpad jong ka tnat Pulit bad ka jingïaknieh ïaid jong ki kali ka la wanrah ïa ka jingdheng kali kaba jur.
“Ka jingdheng kali ar kynta naduh Mawiongrim shaduh Umïam ka la ktah bha haduh katta katta ïa ki paidbah khamtam ïa kito kiba ïabeh ban leit sha Railway Station bad sha Airport Guwahati bad sha kiwei kiwei ki kam,” la ong u Bah Adelbert.
U la ïathuh ba ka jingleit jurip ïa ka jingkieng nar barim ka long ban peit thuh shwa la ka dang i long neem ban pynïaid tang ïa ki kali rit khnang ban weng khyndiat ïa ka jingdheng kali ha surok Mawiongrim shaduh Umïam.
“Nga ai khublei ïa ki Pulit Traffic kiba la trei shitom bad ban pynïaid beit ïa ki kali bad buh ruh ïa ka Mobile Patrolling namarba hynne da la ki jong ki khmat nga la ïohi bun bah ki kali kiba ïa knieh ïaid (Overtake). Ngi donkam ban long kiba don ka jingkitkhlieh bad to ngin long kiba ïaishah bad ka tnat Pulit kaba peit ban pynïaid beit ïa ki kali,” la bynrap u Bah Adelbert.
“Nga ngeit ba ka MePGCL kan phah ïa ki Expert ba kin phah ïa ki briew ban sorbe ba ka lah neem ban long tang ban pynïaid ïa ki kali rit (na kane ka jingkieng nar barim), u la ong.