Ka Sorkar ka kwah ban pyntyllun shakhmat ïa ka jingïakren ïasuk bad ka HNLC: Ampareen

By Mawphor News Desk On Jan 9, 2024

Shillong, K’lyngkot, 08: Ka Nongaiktien jong ka Sorkar Jylla ka Dr. Ampareen Lyngdoh kaba long ka Myntri Sorkar ha ka Lah Sngi u Blei ka la ong ba ka Sorkar Jylla ka dang kwah ban pyntyllun shakhmat ïa ka jingïakren ïasuk bad ka seng kieng atiar ba la shah kheiñ be-aiñ ka Hynñiewtrep National Liberation Council (HNLC).
Ha ka jingïakren bad ki lad pathai khubor, ka Dr. Ampareen ka la ong, “kum ka Sorkar, ngi dang kwah ban ïohi ïa ka jingtyllun shakhmat ka jingïakren ïasuk bad kane ka seng kieng atiar ba la kheiñ be-aiñ bad ngi kwah ban ruh ba ka dei ban don ka jingïasngewthuh jingmut kaba neh shi junom.”
“Kum ka Sorkar bad ka National People’s Party (NPP) ngi iengskhem halor ka nongrim ba ngi kwah ban pynïaid shakhmat ïa ka jingïakren ïasuk bad ka kynhun kieng atiar kaba la shah kheiñ be-aiñ bad ngi kwah ban ïohi ba ka dei ban don ka jingïa sngewthuh jingmut lang na ka bynta ka jingïakren ïasuk ka ban neh shi rta, hynrei ngam lah ban batai than halor kane ka mat namarba kane ka mat ka dei kaba hap hapoh ka jingkhmih jong u Symbud Myntri Rangbah ka jylla uba khmih ïa ka tnat Kam Pohiing hynrei mynta um pat lait por ban shimkhia ïa kane ka mat kaba kongsan hynrei ka seng NPP ka iengskhem ha ka nongrim ban ai jingmut ïa ka sorkar ba kan pynïaid shakhamt bad jingïakren ïasuk” ka la ong.
“Ngi sngewthuh ba ki don ki jingbym hun bad jingbym sngewthuh jingmut bad ïa kine baroh ngi donkam ban da pynshisha shwa bad ngin ap ïa u Myntri ka tnat Kam Pohiing ba un wanphai noh shen sha ka ophis treikam khnang ba yn lah ban ai ïa ka jingbatai kaba bniah” la ong ka Dr. Ampareen.
“Ngan ym lah ban batai bniah halor kane ka kam namarba ngam pat ïoh jingtip bha hynrei ha kum kane ka por nga lah tang ban batai ïa ka nongrim ba ki nongkyrshan ka NPP ki ieng ha kawei ka liang bad ka Sorkar MDA 2.0 hapoh ka jingïalam jong u Myntri Rangbah jong ngi,” ka la bynrap.
Ki san tylli ki jingdawa ba kongsan jong ka HNLC ki kynthup ïa ka jingwengnoh ïa ka jingkheiñ be-aiñ pyrshah ïa ka seng bad ban weng lut ïa baroh ki mukotduma da kaba ai ïa ka jingmap ei sha baroh ki nongïalam bad sha ki dkhot jong ka seng.