Jraiñ raiñ raiñ khyllem Gallery siej katba dang ïakhun ka Mawlai bad Ryntih ha Polo

Shillong, Naitung 14: Ha ka jingjia kaba la pynsaw kyrang ïa ki nongpynïaid jong ka Phutbol jong ka Shillong Premier League (SPL) mynta ka sngi, ka jaka shong paidbah ha Madan Polo, kaba la shna da ki siej bad siang da ki plywood, ka la khyllem jraiñ jraiñ ha ka por ba dang ïaid ka jingïakhun ba shongshit bha hapdeng ki artylli ki team na Mawlai, kata ka Mawlai Sports Club bad ka Ryntih Sc.
Kane ka jingkhyllem ka la la jia ha ka por ba ka Mawlai ka la ïoh thep ïa ka kol kaba nyngkong bad ki nongkyrshan ka Mawlai kiba la pynkhapngiah mam ïa kane ka jaka shong ne ka temporary gallery, ki la ïa shad ïakmen bad kynhoi, kynsan shu jraiñ bad baroh kiba don ha gallery ki la hap bad kyllon lut sha madan.
Donbok ba ha kane ka jingkhyllem ym shym la don ba mynsaw jur, lait noh tang uwei arngut kiba shu mynsaw malu mala. Hapdeng kane ka jingkhyllem ka jaka shong, ka jingïalehkai kala bteng beit bad ki nongkyrshan ka Mawlai ki la ïeng beit ha kajuh ka jaka ban kynhoi bad bad kyrshan ïa ka team kat haduh ba kan da jop syndon ba 5 kol la 0.
Ki nongpynïaid ka SPL kiba dei na ka Shillong Sports Association (SSA) ki la ong ba kadei ka jingbun palat ki paidbah ban shong ha kane ka jaka ba shu shna shipor, kaba la long ka daw jong ka jingkhyllem.
Hynrei ki riew ieit phutbol, ki la pynpaw ka jingsngewkhia halor kane ka jingjia, da kaba pynpaw ba wat lada ka phutbol ha madan Polo ne ha ka jylla ka la don da ki phew phew snem, hynrei tang kawei ka madan phubol ba paka ruh ym don.
Kumba long mynta madan jong ka SSA kaba ju ïalehkai SPL ne ka First Ground ka dang don hapdeng ka jingmoramot bad ka JN Sports Complex ruh ka dang don hapdeng ka jingmoramot.
Hynrei ha Social Media, kiba bun ki la beiñ ïa ki nongpynïaid ka SPL da kaba ong ba kat ka jingïalehkai ba heh tam ha ka jylla, ka shu shna jaka shong tang da ki siej. Ki don kiba la pynpaw ba ki jaka shong ki dang kham bha shibun ha Laitkseh ban ïa kaba ha Polo, namar ha Laitkseh la shna da ki dieng kiba skhem bad siang da ki lyntang.
Ha kajuh ka por ki don ruh kiba la pynpaw lypa ka jingartatien halor ka jingbym don ki madan Phutbol ha Shillong hapdeng ka jingpynkhreh ban pdiang kat ïa kata ka National Games.
Kiba bun ruh ki la kren biria ba imat une u snem u dei u snem jong ka jingkhyllem, ha kaba ka la jia ka jingkhyllem jong ka Dome ha ka jingtei ïa ka ïingdorbar ba thymmai ha Mawdiangdiang, ka jingkhyllem ki surok, ka jingkhyllem ka jingkieng Dwar Ksuid bad kiwei kiwei.