Shillong, Jylliew 23: U Wanbok L Mawphlang bad ka Marqueenless Ramsiej ki la long ki nongjop ha ka ïakop mareh napdeng ki Shynrang bad Kynthei (open men’s & women’s event) ha ka 5th Shillong 10K Run, ba la pynlong da ka Meghalaya State Olympic Association, hynne ka step Sngi Saitjaiñ.
Kane ka jingïakop mareh la ju pynlong man la u snem ban snohktilang ha ka ban rakhe ïa ka ‘International Olympic Day’, kaba hap ha ka 23 Jylliew ban kynmaw ïa ka snem ba la shem ïa ka International Olympic Committee ha u snem 1894. La pynlong ïa ka jingïakop mareh kaba 10km ha kylleng ka pyrthei kum shi bynta ban snohktilang bad ka Shillong ka la long kawei napdeng kine, ha kaba palat spah ngut ki la wan ïashimbynta, naduh kiba dang samla shaduh ki nongshong shnong kiba la san la rangbah, kiba la wan sha kane ka jingïakop mareh.
Ha kane ka kynti, u Wanbok u la jam nyngkong sha kaba kut ban khur namlahduh ha ka kyrdan mareh ki Shynrang lane ka Open Men’s. Mar ïabud ïa u la wan ba ar da u Iwelljohn Ramsiej bad u Sainkupar Jyrwa ha ka kyrdan ba lai.
Ha ka thup ïakop mareh ki kynthei lane ka Open Women’s category, ka Marqueenless, kaba la wan kyrdan ba lai ha u snem ba ladep, ka la ïoh mynta ban poi ha ka kyrdan ba nyngkong kum ka lahduh, bud sa ka Balasiewdor Pathaw ba wan ba ar nangta ka Ivanjilin Khongwir ha ka kyrdan ba lai.
Ha ka thup kiba la 50 snem shaneng ki shynrang (50-plus Men’s event), u Bah Badon Tham u la lah ban khur pat ïa ka namlahduh kumba long ha u snem 2023, katba u Bah Swonding Mawlong bad u Bah Laurence Pariong mar ïabud ki la poi kyrdan ba ar bad ba lai.
Ha ka liang ki kynthei kiba la 50 snem shaneng, ka Kong Ralinda Marbaniang ka la poi ba nyngkong, bud sa ka Smarless Marwein ha ka kyrdan ba ar bad ka Ibameri Shullai ha ka kyrdan ba lai. I meirad Kmoin Wahlang i la ai mynsiem ïa ki nongwanshimbynta da kaba poi kyrdan ba saw na kane ka thup kiba la 50 snem shaneng.
U Assistant Director jong ka tnat Sports & Youth Affairs, u Bah Paia B War Nongbri u la kaweh ïa ka lama ban sdang ïa ka jingmareh hynne ka step, ha ka jingïadon ryngkat u General Secretary ka MSOA – kata u Bah Finely L Pariat bad kiwei ki dkhot nongkitkam ka MSOA.
Ka jingmareh ka la sdang naduh Polo Ground complex shuwa ban phai sha 4th Furlong, BK Bajoria School, PGT College, Shillong Commerce College, Don Bosco Square, Laitumkhrah Police Point, Laitumkhrah Police Beat House, Fire Brigade, Dhankheti, Barik Point, Civil Hospital, State Central Library, Meghalaya Secretariat, Deputy Commissioner’s Office, Governor’s House, Ward’s Lake, ka jaka sah u MR shuwa ban pynkut ha Polo Ground.
La ïoh ban sam khusnam tang lai ngut kiba poi hakhmat duh na man la ki kyrdan, ha kaba ki nongjop ba nyngkong ki la ïohpdiang ïa ka song tyngka Rs 5,000, ba ar Rs 3,000 bad kiba wan ba lai ka long Rs 2,000. Nalor kine, kiba poi kyrdan ba saw haduh ba hynriew ki la ïohpdiang ïa ka Consolation prize bad la sam khusnam kyrpang (special prize) sha ki nongïashimbynta kiba tynmmen.
Na ka liang jong ka synjuk ka la pyntip ba baroh kiba mareh ba ki lah ban download ïa ki syrnod ba wan shimbynta lane ka participation certificate lyngba ka MSOA website (https://meghalayaolympicassociation.com/) hadien shi taïew.
