Mawkyrwat, Rymphang, 28: U samla Donbestar Syiemlieh uwei na ki nongïakura uba la mih khmat ïa ka Meghalaya ha ka Mixed Martial Arts mynta ka sngi u la rah ïa ka nam jop ha lympung ïakura jong ka Club War 21 Four Men’s Tournament Fly Weight ba la pynïaid da ka Bidang Mixes Martial Atrs and Fitness Gym Assam ba la pynlong hapoh ka Bidang MMA& Fitness Gym, RGB Roads, Sunderpur.
Une u samla Donbestar Syiemlieh u dei uwei na ki samla napoh ka South West Khasi Hills District bad uba la long ruh uwei na ki samla ba la pyni ka nuksa ba bha ïa kiwei de namar lyngba ka kam ïalehkai u la ïoh shibun ki jingmyntoi.
Katkum ka jingïathuh jong une u samla ba ha kane ka jingïalehkai ka dei ha ka Flyweight 56kg bad ula ïoh ban ïa khun pyrshah ïa u nongïakura na Nagaland bad na Uttarakhan. Katba ha ka jingïakhun ha ka wat ba khadduh pat u la ïa kynduh bad u nongïakura na Uttarakhand ha kaba u Donbestar Syiemlieh u la ïoh khur ïa ka nam jingjop.
“Ki nongïakura ki don baroh 6 ngut bad 2 ngut ngi ïoh ïa rah ïa ka takma ksiar ne gold medal kata u Amos Nongrang bad u Donbestar Syiemlieh, kiwei pat de ki long u Jonibor Tron, U Kenedy Mawïong Wankyrpang Dame Cuchiang, u Cleverwell Pariong kiba la don lang ban ïa mihkhmat ha ka Ground and Pound MMA Gym Meghalaya ba ïalam da u nonghikai u bah Cores Marweiñ bad katei ka lympung ka dei ba la pynïaid da ka Club War 21 Four Men’s Tournament Guwahati Assam”, ïathuh u bah Marweiñ.
