Nongstoiñ, Rymphang, 27: Ka sngi thep vote ka la dep bad kaba sah ka dei satang ban ñiew ïa ki vote, ban pynbna ïa ki kyrteng jong ki kyrtong kiba jop bad kiba rem, kumjuh ka jingïoh vote ka jong ki nongmihmkhmat naman la ki polling station.
Haba pyrshang ban twad jingmut na ki paitbah nongthep vote jong ki lai tylli ki Constituency jong ka West Khasi Hills ka 32 Nongstoiñ Assembly Constituency, ka 33 Rambrai Jyrngam Assembly Constituency bad ka 34 Mawshynrut Assembly Constituency, ka sur kaba mih na ki paitbah ka long ba lada jop uno uno u kyrtong u ba dei na kano kano ka party ruh ka biang beit, namar kim kwah shuh ba kine ki MLA ba rim kin dang jop.
Bun ki pynpaw ba kim shuh ba kine ki MLA ba rim kin jop biang, ka dei namar ka long kaei kaei kaba sngew lehraiñ haduh katta katta ban ïoh sngew ba wat ki khynnah rit ruh ïa ka kyrteng high level ka sawa khlem kut shuh. Ym tang ka ktien high level hynrei ka jingleh shilliang khmat ha man la ki bynta, ka la paw pyrthei ym tang ha la rympei hynrei ha man la ki rynsan social media bad haman la ki lad pathai khubor la ki dei lyngba ki Channel bad ki kot khubor.
Don kiba ong ba ha u 2018 ki paitbah ka Nongstoiñ constituency ki la trei shitom ban pynjop ïa u MLA, namar ba ha ki jingïalang paitbah u la kular ban hapoh 180 sngi un pyllait ïa ka jingkhang ban tih bad shalan ïa u dewïong. Nangta ban ai kam sorkar uwei naman la ki thliew ïing, hynrei ynda la pynjop ïa u, ka mih kata ka kynhun high level bad kiba ïoh lad ban shalan dewïong ki dei tang ki briew jong ki high level.
Haba phai ha ka thung kam thung jam ruh kumba ka la paw pyrthei ha ki lad pathai khubor, ka la don ka jingnoh shilliang kaba jur haduh katta katta kumba ka la paw ha ka shithi ba u SE ka tnad PHE Western Circle u la pan map na u Deputy Commissioner halor ka jingthung kam sop sop.
Ha thaiñ Rambrai pat ki paitbah ki la ong ba lada u bah Kimfa S.Marbañiang u neh ha ka party Congress, baroh ki nongkyrshan jong u kin ym kynriah. Hynrei, ka jingleit pynïasoh jong u sha ka NPP ka la pynsngewsih ïa baroh ki nongkyrshan.
U bah Bormanding Nonglang u nongïalam ba hakhmat duh jong ka thaiñ Mawdoh, u la ong ba ka jingleit pynïasoh jong u bah Kimfa S Marbañiang sha ka NPP, ka la pynsngewsih ym tang ïa ki paitbah nongkyrshan, hynrei ïa baroh ki nongïalam ba hakhmat jong ka Congress napoh ka Constituency.
U la ong ruh ba ym tang u bah Kimfa, hynrei ka jingkren lap lah jong u bah Bajop Pyngrope MDC u ba don lang ha ka NPP, ka la pynsngewsih lut ïa ki paitbah ka constituency baroh kawei. U la ong ruh ba ka liang jong u, u da kwah eh ba ki paitbah ki dei ban pynrem don burom ïa u bah Kimfa ha kane ka kynti.
Ha Mawshynrut Assembly Constituency, ki la ong ba ki la pynjop ïa u bah Gigur Myrthong ha u 2018 da ka jingkyrmen ba un leh ei ei na ka bynta ka Mawshynrut constituency, namar ka dang dei kaba dang sah dien hynrei um shym la lah ban leh ei ei satia lait na kaba wanrah ïa ki coke factory beaiñ.
U bah P.Shyrkon uwei na ki riew rangbah ka thaiñ Maweit, u la ong ba ka long kaei kei kaba sngew lehraiñ ba ha ki snem ba mynshuwa ïa ka surok na Nongstoiñ sha Maweit, la kular ban pynpoi haduh Kulang Nongjri haduh Maheskhola. Ka jingkular ka long da ka two lane, hynrei mynta ka la kylla Intermediate lane bad ka jingpyntrei ruh ka dei tang 23 kilomitar kaba poi beit thik tang ha Mawdom ka jaka kaba don ar tylli ki dukan kyiad.
U la ong ruh ba kane ka pyni shai ba ka sorkar MDA ka dei ka sorkar kaba sngew tynnad ban ïohi ba ki samla kin ngop ha ka jingdih kyiad. Kane ka pynsngewsih haduh katta katta ïa ki paitbah, lait noh tang ïa kito ki ba la ïoh jingmyntoi na u MLA. Hynrei palat marshiteng na ki paitbah ka thaiñ Maweit, ki la ngiah bad kim kwah shuh ba u bah Gigur Myrthong un dang jop ha kane ka election ba mynta.
Tangba kine ki jingkren kynthoh jong baroh kin sa paw pat ha ka 2 tarik, namar lada jop biang ki juh ïoh lehse lane kin nang wanrah shuh shuh ïa ki jingkylla kumba ki la dep leh ha ki san snem ba la dep.
