Ka jingïaseng Synod la ha khmut, ka surok ym pat leh eiei, bitar ka HYC ba leh mon ki Contractor

Nongstoiñ, Rymphang, 28: Ka Hynñiewtrep Youth Council HYC Lai Lyngdoh Circle, ha ka taiew ba la dep ka la leit jurip ïa ka surok ban leit sha Nongkhlaw, Nongstoiñ West Khasi Hills District ka ban long ka jingïaseng Samla KJP Synod Sepngi ha ka 3 haduh 5 tarik Lber 2023.
Mynta ka sngi pat hapoh ka jingïalam u Samla Wandappynkmen Marweiñ President bad Samla Willbirtson Kharsyiemlieh General Secretary HYC Lai Lyngdoh Circle, ka la leit ïakynduh ïa u Executive Engineer ka PWD ha Nongstoiñ, ha kaba u la ïathuh ha ka seng ba la dep mang kumba 6 klur ïa katei ka surok.
Ka seng pat ka pynrem ïa ka jingleh sting ka PWD, namar katei ka surok na Pingbah ha Nonglyngdoh sha Nongkhlaw lah shu siang torti bad stang palat. Katei ka 2 kilometer na Nonglwai 2 haduh Mawkaïang ha Nongkhlaw, jaka pynlong jingïaseng lei lei, tang ban tih surok ruh pat dep haduh mynta. Ha ka jingshisha la mang ban siang maw bad siang rong.
“Kane ka pynpaw ka jingbym kit khlieh ka Department. Ha ka jingshisha katei ka 6 klur ka dei ban ai jingmyntoi ïa ki paitbah ba wan Synod bad ïa ka thaiñ. Pynban imat ka la long ka jingmyntoi pynban tang ïa ki Contractor kiba dei ki briew jong ki Nongmihkhmat”, ong u samla Wandappynkmen Marweiñ President.