Jop ka Warjaiñtia XI da 4 kol ïaka Rangdajied United FC haka jingïalehkai paralok ha Pdengshakap

Jowai, Jymmang 25: Ka Warjainñtia XI kala long ka lahduh haka jingïalehkai phutbol (friendly match) bala pynlong daka Sports & Youth Sub Committee jong ka Warjaiñtia Students’ Union (WJSU) ha ka sngi Saitjaiñ ha madan phutbol ka Pdengshakap, Amlarem Sub-division da kaba jop haduh 4-0 kol ïa ka Rangdajied United FC.
Ha shwa ban sdang ka jingïalehkai la ïoh ban pynshongshit ïa ki paid riewïeit phutbol kiba wan peit kai ïa kane ka lympung, da ki jingrwai naka kynhun rwai ba paw ka jylla ka “Khmih Creative Society, Shillong” kila ai haduh lai tylli ki jingrwai ba sngewtynnad.
Haba phai sha ka jingïakhun jong ka kylla step kala long kaba ïakhaid bha hapeng kine ki ar tylli ki kynhun, namar baroh ar ki khynhun kila sep pyrthei ïala ki sap ki phong ïalehkai ha madan bad kim shem la ïoh ban thep kol bad ka jingïakhun jong ka kylla step kala neh da 0-0.
Haba wan ban bteng ïa ka jingïakhun haka kylla miet ka kynhun ïalehkai jong Warjaiñtia XI kala ïoh ban theh haduh 4 tylli ki kol, kata haka minit ba 59 da u Shano Tariang, u Phrangki Buam ar kol haka minit ba 65 & 75 bad u Jefferson Pakynteiñ haka minit ba 68. Lyngba kine ki kol ka Warjaiñtia XI kala long syndon ka lahduh jong kane ka jingïakhun paralok.
Na ka liang u General Secretary ka WJSU samla Everest Langstang haka jingkren ula pynsngew ïa ki kam ba bha ka seng, kiba ka don jingmut ban leh naka bynta ki khun samla jong ka thaiñ War Jaiñtia hi baroh kawei kata naduh ka kam Sports bad kumjuh ïa ka pule puthi.
Shuh shuh ula pynkynmaw ba ka WJSU kala sdang ïaka 1st Warjaiñtia Invitation Football Tournament 2025 hapdeng ki jingeh kiba bun, hynrei da ka jingïasnohkti lang jong ki paidbah nongshong shnong ka thaiñ la lah ban pyndep ïa kane ka Tournament hapdeng ka jingiphuh iphieng kaba ai mynsiem ruh ïa baroh ki nongwan ïashim bynta.
Kumjuh ruh haka pule puthi ka seng WJSU kala dep ban pynlong ïaka 1st Warjaiñtia Scholarship Examination 2024 bad la jied ïa ki spah ngut ki samla pule kum ka lad ban ai jingïarap ïaki ba kin bteng shuh shuh ïa ki jingïakhun ha kiwei de ki exam kiba kham shalor.
Ïa ki khusnam sha ki nongjop la sam da u kongsan ma Wansuk Lamin uba dei i Prominent Footballer Warjaiñtia ryngkat u Symbud kongsan ma Ombormi Tariang President ka JYF. Na ka liang u ma Wansuk haab ai jingkren ula ai khublei kyrpang ïa ka WJSU kala la lah ban pynlum pynlang kumne ïaki khun samla ka War Jaiñtia ha ka liang ka kam ïalehkai phutbol.
Ha ka juh ka por ula kitbok ïa baroh ar tylli ki kynhun ba kin dang ïatrei shitom ban sei ïa ka sap bad ka phong ïalehkai jong ki ha kine ki sngi ban wan. Ïa ka jingïalang ha kane ka sngi la pynïaid da u Heartcasing Dkhar u Vice President ka WJSU, katba ïa ki kyntein ai khublei la ïoh na u D. Syad uba dei u Sports Secretary ka seng.