Shillong, Jymmang 25: Ka Meghalaya Football Association (MFA) ka la pyllait paidbah ïa ki kyrteng jong ki rangïalehkai kiba la ïoh ïa ka jingmynjur ban kynriah kynhun hapdeng ki district (inter-district transfer) na ka bynta u snem 2025.
Baroh ki don 329 ngut ki rangïalehkai kiba la apply bad pyndep ïa ki kyndon jong ka jingkyntiap klob, kaba kham bun ban ïa ka jingkheiñ jong u snem ba la dep kaba long 122. Ka tarik ba khatduh ban pyndep ïa ka jingkyntiap klob ka long ha ka 24 tarik u Jymmang.
Ki kynhun ïalehkai kiba ïasoh bad ka Shillong Sports Association ki la soi haduh 95 ngut ki rangïalehkai na kiwei pat ki kynhun ïalehkai district, katba kiba ïasoh bad ka Thadlaskein Sports Association (TSA) ki la soi 72 ngut bad ka East Jaiñtia Hills District Football Association ki la soi 54 ngut.
Ka jingbun jong ka Thadlaskein ban soi rangïalehkai lah ban batai hadien ba la pynim biang ïa ka TSA ha u snem ba la dep da ka jingkyrshan jong ka MFA. Ka jingpyn im biang bad jingpynïasoh biang ïa ka TSA bad ka seng kmie jong ka phutbol ha ka jylla ka mut ba katto katne ki klob ki la jied ban ïaid hapoh ka shatri (jingpeit) jong ka TSA da kaba wanrahlang ïa ki rangïalehkai.
Haba pynbna ïa ka thup jong kiba la mynjur ban pynkynriah klob, u General Secretary ka MFA u Bah Sunesh Syiem u la pynkynmaw ïa baroh ki synjuk district ba ym don uwei ruh u rangïalehkai uba lah ban ïalehkai palat ïa kawei ka District Sports Association ha kawei ka samoi lehkai. “Sngewbha kynmaw ba lada lap ba don kino kino ki rangïalehkai kiba pynkheiñ ïa kine ki kyndon, baroh arngut u nongïalehkai bad kumjuh ruh ka synjuk district kin ïakynduh ïa ka jingshah pynshitom ha ka MFA katkum ka rai ba ka ibit,” u la bynrap.
