Shillong, Nailur 22: Ar tylli ki kynhun ba kynthup ïa ka PFR Academy bad ka Jongksha SC, ki la khur jingjop ha ki jingïalehkai ba la long ha ka Sngi Saitjaiñ (21 tarik Nailur, 2024) ha ka lympung ïalehkai Second Division jong ka Shillong Sports Association ha SSA Ground, Polo.
Ka PFR FA ka la jop da 1-0 kol ïa ka Marbisu SC ha ka jingïalehkai na ka Group B, katba ka Jongksha SC ka la pynliem suk ïa ka Mylliem Lum SC da 3-0 kol.
Ha ka jingïakhun kaba nyngkong, ka PFR ka la ïoh ban pynkhih ïa kane ka kol ha ka minit kaba 32 lyngba u Robi Maring. Kane ka shi kol ka la biang pura ïa ka kynhun ban khur shalade ïa ki lai point ba pura.
Haba phai sha ka jingïakhun kaba bud, ki lai kol na bynta ka Jongksha la thep da u Basuk Bina (24 minit), u Robert Khongjoh (28 minit) bad khadduh na u Iohbor Nonglyer (71 minit).
Ki jingïalehkai mynta ka sngi ha ka kyrdan Second Division ha SSA Ground- Polo, ha ka por 12 baje mynsngi ka Sohiong SC kan aireng pyrshah ïa ka Imson SC, nangta ha ka por 3 baje nohphaisngi ka Umphrup SC kan ïakhun pyrshah ïa ka Meghalaya Police.
