Khliehriat, Nailur 25: Ka jingïalehkai phutbol 1st Division bala pynïaid da ka East Jaiñtia Hills District Football Association (EJHDFA) kaba la long hynne ka Lah Sngi U Blei ha madan Deinchynrum, Khliehriat.
Ka Musniang SC ryngkat bad ka Rangad SC kila long ki kynhun kiba la khur namjop ha kane ka sngi.
Na ka liang jong ka Musniang SC ka la khur ïa ka namjop hadien ba ka la pynliem da 3-1 kol ïa ka Mukhaialong SC. u Mardiphone Rymbai u la ïoh ban khyrwit ar kol na ka bynta ka Musniang SC kiba u la thep haka minit ba 11 & 20 nangta ka kol kaba lai la thep da u One enjoy Dkhar haka minit ba 45+3. Katba ïa ka shikol naka Mukhaialong SC la thep da u Bino Phawa haka minit ba 67.
Ha ka jingïakhun kaba ar ka kynhun ïalehkai jong ka Rangad SC kala khur namjop salit da 1-0 kol pyrshah ïa ka Shilliang Umshong SC, ïa katei ka shikol na ka Rangad SC la thep da u Wingki Dkhar haka minit ba 31 kaba la biang pura ïa ka kynhun ban khur ïa ka namjop.
