Gujarat, Nailur 25: Ka long ka burom bad ka jingsngewsarong ïa ka jylla Meghalaya hi baroh kawei ha kaba arngut ki rangïakura jong ka thaiñ kiba la leit shimbynta ha rynsan jong ka Pro Boxing Fight Night ba nyngkong ha Gujarat, ki la wanphai ïing ha ryngkat bad ka namjop.
Haba phai khyndiat sha kane ka lympung ïakura kaba la pynlong hynnin ka Sngi U Blei ka 24 tari Nailur, 2023, ka dei kaba la pynlong ryngkat ka jingïarap na ka Indian Boxing Council (IBC), bad la sakhi haduh 13 tylli ki jingïakhun hapdeng ki rangïakura kiba na kylleng jong ka ri India ha la ki jong ki kyrdan lane Weight Division.
Kumban shu pynkynmaw, ki la don lai ngut ki rangïakura napoh ka jylla kiba la leit ban shimbynta ha kane ka rynsan ïakura professional boxing kaba la pynlong shapoh Gujarat, kiba kynthup ïa u Shanborlang Marbaniang, u ïarapborsing Kharbani bad u Elbin Rani u ba la mad namrem ha u nongïakura ba na Haryana.
Haba phai sha ka jingïakhun hapdeng u Shanborlang Marbaniang (Meghalaya) pyrshah ïa u Madan Pratap (Andhra Pradesh) ha ka kyrdan Flyweight, u ne u rangïakura ka jylla u la ïai bteng ban sei madan ïala ka jong ka sap da kaba pynkhyllem (Knock Out) ïa u rangïakura ba ïakhun pyrshah ha ka wat ba lai (Round 3) ban khur shalade ïa ka namjop.
Katba na ka liang jong u ïarapborsing Kharbani (Meghalaya) u la ïoh ban kyntiew ïalade ha ka thup kyrteng ki nongjop hadien ba u la lah ban pynliem ïa u Devavath Anil Kumar (Telangana) ha ka kyrdan Bantamweight lyngba ka rai jong ki nongbishar (unanimous decision).
