Jingjia ha Pamphyrnai: Kaei ka jingpynshitom pyrshah ïa u DC uba ai jingbit, Adelbert Nongrum
Shillong, Nailur, 19: U MLA jong ka Voice of the People Party (VPP) na North Shillong u Bah Adelbert Nongrum ha ka sngi Baar u la pan jingtip kaei ka jingpynshitom ïa u Deputy Commissioner jong ka West Khasi Hills halor ka jingai jingbit ban pynlong ïa ka jingïakob khwai dohkha, kaba la wanrah ïa ka jingdheng kali kaba lam sha ka jingïap jong iwei i khunlung ba dang shu kha ha Pamphyrnai kaba hap ha ka shnong Ksehkohlong, West Khasi Hills District.
Haba wanrah ïa kane ka mat ïatai ha ka Zero Hour Notice ha ka Dorbar Synrai jong ka Ingdorbar Thawaiñ, u Bah Nongrum u la ong, “kaei ka jingpynshitom pyrshah ïa u DC jong ka West Khasi Hills uba la ai jingbit ban pynlong ïa ka jingïakob khwai dohkha khlem da don shuh ka jingkitkhlieh ban tem ïa ka shongsuk shongsaiñ bad pyrshah ïa u SP jong ka West Khasi Hills uba la ailad ïa ki Pulit ban ïadon bynta bad ki nongpynïaid ha ka jingsam khusnam katba ym don satia wat tang uwei ruh u Pulit u ban peit ïa ka jingpynïaid kali bad ban tehlakam ïa ka jingïalum paidbah.
U la ong, ha ka 16 tarik, Nailur, ka kmie ka la kha ïa i khunlung khlem da don nongïarap ha ka kali kamai, namarba ka kali ka la ngat ha ka jingdheng kali kaba 3 kynta na ka daw ka jingieng kali ha baroh arliang surok bad ka jingbun shaba palat u paidbah kaba la wanrah ïa ka jingdheng kali na ka ka jingpynlong ïa ka jingïakob khwai dohkha ba la pynlong ha ka pung Pamphyrnai, West Khasi Hills.
U Bah Nongrum u la ong ba ki bor synshar District kim shym la don ka jingkitkhlieh haba ai ïa ka jingbit khlem da pyrkhat kumno ban tehlakam ïa ka shongsuk shongsaiñ, bad la ïohi ruh ba ki Pulit ki la ïadon bynta lang ban sam khunsam katba la lap ba ym shym la don uwei ruh u Pulit ban tehlakam ïa ki paidbah kiba pynwit ïa ka leit ka wan jong ki kali ha shilynter ka surokbah Shillong-Nongstoiñ ha ka jaka ba don ka jingïakob khwai dohkha.
Une u nongmihkhmat u la buh jingkylli, hato ka Sorkar kan pynsangeh noh neem ïa ki jingïakop khwai dohkha, ym tang ha West Khasi Hills hynrei wat ha kiwei kiwei ki district ruh kumjuh, tad haduh ban da pynmih da ki kyndon da ka aiñ, khnang ba kum kine ki jingjia kin ym wan jia shuh naba ki buh jingma ïa ka jingim briew bad ïa ka koit ka khiah jong ki paidbah.
“Hato ka Sorkar ka la pynsngew neem ïa ka jingktah jong ka jingïakob khwai dohkha, kaba ju long manla ka sngi saitjaiñ, ka sngi ïoh kamai taiew jong ki longing ha ki nongkyndong, kiba la kyrni ha ka jingshah pynngop ha ka khusnam pisa kaba kot kumba 50 lak tang ha kawei ka jingïakob, haba ka bai rung ka long 2000 hajar haduh 3000 hajar………bad lehse tang shi naïa ka pisa kaba leit sha ka khajna jong ka Sorkar,” ula ong.